Myanmar ram buainak ruangah India, Mizoram, Zokhawthar khua ih raltlan pawl cu an umnak ti le khua ih daan thlun dingin Zokhawthar YMA cun November 15 ah forhfialnak a nei, tiah theih a si.
Tonkhawmnak ah YMA hotu cun raltlan pawl cu khawsung mino cangvaihnak, siatni thatni le biaknak ah tel hai dingin a forhfial vekin rukru, rittheih sivai dokhamnak khalah tuantlang dingin a sawm fawn.
YMA Vice President Pu Dintea cun, “Kan khawsung bike mawn daan kan tuahmi ah meter 20 a si. Asinan khuallian kan neih caan le emergency motor an rat caan ah raltlan pawl cu bike cak zetin an mawng ih khuallian motor khal hngak loin an lan hluahhlo hmuh tikah thin a nuam lo.
Lehhnu ahcun bike mawn daan kan tuahmi pahbaltu cu mawh kan phurh a tul ding,” tiah a sim.
Cuhleiah kannih Mizo/Chin miphun cun kum upa, nutar/patar kan tihzah ih tlawmngai nun kan neih vekin hi kan nunphung tha hi somsotlang vivo uhsi, tiah a sawm fawn.
Tuvekin Myanmar ihsin raltlan pawl hnenah a nemzawng ih nunsimnak tawlreltu hi Zokhawthar YMA an si.
Zokhawthar ahhin raltlan innsang 600 lenglo le mipum 1288 an um, tiah an ngankhum.
Leave a Reply