Zohṭhimtlak SALAI VAN BAWI THAWNG

Zohṭhimtlak
SALAI VAN BAWI THAWNG
(Riakmawva Hram Aw Producer)

👨‍💼 Ziangvek Mi A Si
Anih hi 2010, Delhi ih ka ton tirin mi a biakson dan ka zoh tikah ‘mi danglam’ tak a si hrimhrim. Mino kharvar, thu le hla ngainami le ziaza mawi kengtu a si.
‘Tleirawl ṭhan aat lai’ tivek amah ah hmuh ding a um ve lo. A khawhoi dan ah a tlang aa lo rengreng.
💪Sunghno a nu in tuan takin a thihsan ih a pa le kum upa thlang ti fam cu pai zangcansawng in innsang zohkhentu bik a si. Innsang tuaktotu bik ti takah zirnak ruunsang khal a kai thei lo, zing nisuak siar in pumcawmnak hrang tai a sir ko sawh lo maw!
Cuti cingin kawhhran le khawtlang ah a pumpek a ṭhulh cuang lo. Nui’ zuun tuar le hringnun sukso zawh tam a sinak cun zaihla phuah/sak thiam ah a suahter ih awnmawi tum tiang a thiam phahter rori.
⛹Vanduaithlak zetin Australia an thlen hnu reilote ah a pa in mual a liamsan. Cutin nu le pa khop lo zet le harsa zetin hringnun sumzing sah zet a pahtlang thei thotho. ‘Mi pitling si dingah innsang background a thupi lo, Mah rori a thupibik’ ti hi amah ihsin zir duh cun zir theih a si.
💆‍♂️ A Suahsemnak
A piannak kan zoh asile Mizoram a si. Curuangah Mizo hmin Zorampianga, Chin hmin Van Bawi Thawng tiin pahnih a neih phah. Amah theitu cun ‘Piangte’ tiin kan ko tam!
💻 Zuknung Ih A Pumpeknak
Zuknung lam paihmi a si vekin IHBURLEN pictures ih suahmi ‘SANTISUAR’ Film a rak zoh ih a duhthu a sam lo. Cumi cu soisel le nautat siang loin tlaksamnak zawn Sumpai bik a si ti a hmusuak. Zuknung ṭha sersuak ding cun sumpai thazang a ṭul tuk, ti sim bet a tul riai lo.
Cutin IHBURLEN pictures thawn hnaṭuantlang dingin thutiamnak a tuah ih anih in sumpai lamin theitawkin zuampi a huam thu a rel.
‘RIAKMAWVA HRAM AW’ zuknung tuahnak ding hmun Chinram a si thu a theih le phei cun a phur deuhdeuh.
✈ A ke in Chinram leilung a pal hrih lo, a mit khalin a hmu hrih lo. Chinram zilthlithiang khal hawp dah lo ko sawh, Chinram le miphun a seherh thei hi ‘mi maksak a si’ kan ti lo thei lo!
❌ Mi cu ram cangkang an thleng ih mai suahsemnak khua le ram an dungtun vivo, Chinmi si khal zahpi tiang an um.
✔ Anih cun a nu le pai suahnak Chinram le Chin nunphung zuknung hmangih phosuak ding hi a ṭuanvo ah a la ngam!
✍ Neinung a a si ruangah Producer a ṭuan kan ti pang kei, kan palh lellel. Tlawngkai phah, part-times ih hlawhaw phah a si. Pumpeknak ruangah a si bik ko.
🕴A Lungput
Zuknung 🎬 phawthawi (shooting) kan thok taktak. Budgets estimated tuahmi in a daih lo. Ruah hnakin tikcu lak a rei. Laitlang Lairawn vei tam suksonak ah cemliam a tam. Thilri man an rak khungkhai.
Cuvek khalah a phunzai lo, hlaral ihsin beidong lo dingin thapek mi a thiam. “A ṭha bikin kan ṭangkhawm ding” a tithei ringring. Mipitling tak a si.
🏜 A Sunmang
A tlanlennak miphun picang pawl lungput la in ‘caan khat’ hrang lawng hnaṭuan a tum lo. Zuknung industry/company picang lawlaw din a duh. Kan tontehmi pawl nun zirhtu ah hmangin tundin ṭhatawk vivo a duh.
Hmailam ah a tenau zetmi IHBURLEN pictures thawn Chin zuknung sersuah sunzom vivo khal a iai lo…
🍾 Salai Van Bawi Thawng, Pathian in lo thlawsuah hram seh. Chinram ih suak lo nain, miphun duhdawttu Chin Fahniang na sinak hi zohṭhim na tlak tuk.
Cu lawng lem, miphun dang zuknung in Chin miphun in dolh-hlo ding ngai ngam lo ih Chin Zuknung meisa na hmuah duhnak hi a ropi. Na hmin a dai dah lo ding, sankhuk tiangin!
🌟 Duhthusam
Chin mino, ram duh, phun duh Salai Van Bawi Thawng bangtuk minung pahra um hai sehla kan miphun in hma kan sawt zet ding…Chin zuknung khal par mawi a suah vivo thei ding nan…
(Thubet: Amah hi hnakruh kim hrih lo a si).😁

By,
Film Director

Be the first to comment

Leave a Reply

Your email address will not be published.


*