Ziangruangah nitlaknak ram pawl in NUG an pom thei lo?

Nitlaknak lam ram pawl hin SAC ralhrang ih thuneihnak an lak cu an dem zet ko nan, NUG parah rinngamnak an neih le neih lo boruak an thlir rero laifang a si. Hi ruangah Myanmar ram hin Democracy hrang dothlengnak a sawt lo phah.

No description available.

Paris ih ram thu hliakhlaitu David Frederic Camroux cun February thla ih thuneihnak latu ralhrang le a dokalhtu pawl khal nitlaknak ram pawl hin an theihpit lo veve, a ti. Asinan ralhrang lawngte an dem hai ih mipi pawl an kaihhrem le an thah tam tuk ruangah pursum leilawnnak ziangmawzat a phihsak. Cule hrilawknak ih nehnak cotu NLD hnenah thuneihnak hlan dingin an nor.

April thla lai hrawngah NLD le tlangparmi ṭangrual cun NUG acozah thar an din. Asinan nitlaknak ram pawl in NUG siseh SAC khal siseh zumngamnak an neih le neih lo, rel dingin an nuar lai. The World Health Organization, the International Committee of the Red Cross le UN Human Rights Council ah SAC ralhrang lam sawm an si lo vekin NUG khal an sawm ve cuang lo.

“Nitlaknak Democracy ram tam sawn hi Thein Sein acozah a kai (2010-2015?) hnu lawngah Yangon ah Embassy ong an si. A umzia cu NUG hi pom hai bang sehla an Embassy zung pawl SAC ralhrang in a kharsak thei. Cutikah Myanmar ram sungah thuneihnak an hloh vivo ding ih Russia le China ih dawngte puahnak menah a cang ding ti an hmu keukeu, tiah Phil Robertson cun a sim.

Ziangahtile SAC ralhrang hin thuneihnak a lak veten China in a dinpi ih Russia thawn ralthuam thu ah an vehvaiaw tam bik fawn. Nay Pyi Taw le hluttaw sungah China le Russia vok lal len ih a len ding cu nitlaknak ram pawl hin an ngai ngam lo a si bik.

Cun, USA le European Union hin NUG pom in a sung thu ah buaipi ciamco bang sehla mai kuang lo nor vek an si ding ih ASEAN in an ngaih lo zet ding. ASEAN hmai bal dingin belmang tatsak vek a si ding. Cumi hmu ban in USA le Europe ram pawl hin hlaral ihsin ASEAN thapeknak bak titheimi an nei ve lo. ASEAN in Myanmar hrangih a tuahmi thukam (5) kha tlamtlingtei’ a hlawhtlinter theinak dingah an nor rero men!

ASEAN asile NUG sawm timah tim loin SAC ralhrang bawi Min Aung Hlaing lamlam a sawm riangri tikah ralhrang hi a pompi ti thawn a thu a hmunkhat ko. Asinan UN cun September thla ah ‘zoi’ ruhte ring sawn maw’ tiih sualaw NUG le SAC lakah a dikmi acozah a hril thlang ding.

Curuangah SAC ralhrang lam cun an doral CRPH/NUG lamtang UN palai U Kyaw Moe Htun cu hlonhlo dingin an zuam rero. Anih hin February laiah UN meeting nak ah mipi lamṭang in thu a rel ruangah SAC ralhrang ih sahuatnak takfang tawhsak vek a si.

NUG hrang ruahsan um ve zet cu ramdangdang hotu lam pawl online ihsin komnak an neih thei hi a si. Himi ah nitlaknak ram pawl in NUG tha an pek thu le hluttaw lamih thu an bursak ding thu an sim cio. Khatlam zawngah June thlatir ih UN General Assembly ah SAC ralhrang cangvaihnak lungkim loin an do cio ih Belarus ram pakhat lawngin SAC ralhrang a dinpi a si kha!

Asinan hi ruangah September ih UN thuṭhencatnak ahhin NUG in vote zaten a hui ṭheh ding, tinak a si lo. A hleicein Europe ram tam zet hin Myanmar thu ah cutlukin an hlawptlo ciamco lo. Ziangahtile NLD acozah a kai laiah Suu Kyi le a ho pawl hin Europe ih an ṭhianrual pawl an pehtlaih ṭhiṭha nawn lo, ti a si.

Rohingya thu ah rampi thuron Daw Aung San Suu Kyi rori in Kawl ralkap lamṭang in ICJ ah khabe a va sep sual ruangah nitlaknak ram le ram tampi in Myanmar thu le NLD, CRPH/NUG hi mak ah an siar lo deuhdeuh. Suu Kyi cu ICJ ah Rohingya miphun parih miphun cimihnak a um lo thu, Rohingya khal anmai’ hmin in ko loin ‘Bangali’ a ti ve ruangah Kawl ralkap palai tlukin an hmu sakhi thluh.

Kan dung thla ah US Congressman Ted Lieu in, ‘NUG sungtel ah Rohingya hmel a lang lai hlanlo, NUG hi acozah ih pom ding lamzin tampi a dipdal lai,’ a ti. Curuangah NUG cu an phar an tlio ciamco ih fapa tlanhlo tlukah suah in Rohingya pawl kawh tlun dan le 1982 laiih rammi si theinak daan Rohingya pawl khaksuaktu daan cu an ṭhiatbal rupri. Himi ih an duh san cu a langfiang zet! Ram tampi ih an pom theinak dingah Rohingya pawl suncaw fun ah an hmang tum a si bik!

Asile NUG hi thuneihnak ngahsal bang sehla Rohingya 1 million lenglo Myanmar ram ah an ra kir taktak pei maw? Ra kir bang hai sehla an umnak Rakhine pawl in an cosang thei pei maw? Sakhuanak aatcilh Kawl phungki rual teh hin ziangtin an ruat pei? An biaknak Buddhist cimral ding an ngaingam pei maw?

Ziang a si khal le mipi ṭhumawknak umsun NUG hin hmabak a nei tam tuk lai. Ramdang pompinak a ngah hnuah SAC ralhrang a tukdai thei ding ih cui’ hnuah ram mipi Federal Democracy hmangin a uk lai ding. (Hi thu hi Kawl ca a remcan dan ih kan lehmi a si).

Be the first to comment

Leave a Reply

Your email address will not be published.


*