Yangon, Mayangone peng, Kaba Aye lamzin ih inn pakhatih khawsa kum 65 mi tlawng sayama pinsin la zotu pakhat cu June 11 ah an that, tiah tlawmngai pawlkom sungtel pakhat in a sim.
A thahmi hi Yankin phunsang tlawng ah Burmese Language zirhtu rak tuan dahtu Daw Nyunt Nyunt Sein a si ih pinsin a la zo, tiah theih a si.
Tlawmngai pawlkom sungtel pakhat cun, “Zan nazi 4:10 hrawngah sayamagyi ih sungkhat mi pakhat cun bomnak in dil ih kan va thlen tikah a rak thi zo. Saymagyi hi a ihnak pindan sungah a kut pahnih Phone charger hri in an ṭawn. A lu ah kutthlaknak sulhnu a um. Rukru misual ih cangvaihnak a bang,” tiah a sim.
Atufang ahcun palik pawl in zingzoinak an nei ih zualkotu a sungkhat cu thuhla an sutfiang rero lai.
A thitu Sayamagyi ih inn sungah Laptop pakhat le Phone pakhat a hlo ih thil dang a hloh le hloh lo theih a si hrih lo.
Sayamagyi hi mi daite a si ih zo thawn khal thukam elaw ih buai dah a si lo. Sangka khal a ṭul tuk loah a ong dah lo ih felfaiten khawsa thiam zet a si.
A ruak cu North Okkalapa sizung ah an phur phei. Cumi hnuah a vui dan ding theih a si fang ding.
Yangon ahhin ram boruak siat ruangah rukru le suamhmang an tam zet ih ralrin a ṭul zet, tiah tlawmngai pawlkom ih sungtel pakhat cun a rel.
Leave a Reply