America ram, Alabama ramkulh ih biakinn pakhatah June 16 ah meithal kahnak a thleng ih mi 2 an thih hleiah mi 1 in hriamhma a ngah, tiah palik pawl in an sim.
Alabama ramkulh khawpi Vestavia Hills khawpi ih St. Stephen’s Episcopal biakinn lengah kahawknak a suak ih rinhlelh mi pakhat cu khawpi palik pawl in an kai zo, tiah Facebook cahmai ah hmuh a si.
Hi biakinn ahhin mi tam zet cu mai’ neihmi in le ei keng in zanriah an hilkhawm laiah meithal ih kah an si thu biakinn website cun a tarlang.
USA ahhin tu le tu kahawknak a thleng leuhleuh ih a besiat bik tum cu Texas ramkulh sung tlawnginn ah May 24 ih kahawknak kha a si.
Hi meithal kahnak ah tlawngta nauhak 19 le sayama 2 in an nunnak an hloh.
Tui’ kum thok lawng menah mi 20000 hrawngin nunnak an hloh zo ih himi lakah mah le mah meithal ih kapaw khal siar tel an sim.
Pary pahnih komkhawmaw in meithal hman sian cin relkhawmnak an nei ih June 16 ah Republican lam an suak tau nan, Democrats lam cun hi daan hi an nemhnget thotho ding, tiah a hmu thiamtu pawl cun an sim.
Meithal ken theinak daan hi khohkhah deuh dingih zuamnak thu ah Party 2 lakah hmuh dan bangaw lonak um hmansehla a ra lai dingmi zarh hrawngah vote lai in lairelnak an nei thotho ding, tiah Democrats lam ih lairelnak hotu Mr. Muffy cun a sim.
Leave a Reply