US in tha zetin raldo training a pekmi Afghanistan Commando ralkap hlun pawl in Ukraine ram siimnak ah Russia an bawm, tiah theih a si.
US in Afghanistan ram a suahsan hnu Taliban pawl ih uknak duh lo ruangah Afghan mipi tam zet ramdang ah an tlan hai.
Cumi lakah US ih raldo a rak zirh dahmi US ralkap thawn raldotlang, Afghan Commando ralkap pawl cu Iran lamah an tlan ve.
Russia le Iran an pehtlaihawknak a that vivo ruangah Iran ram ih raltlan Afghan Commando ralkap hlun pawl cu Russia le Iran lungkimnak in raldo hlawhfa ah Russia in a sawr hai, tiah Afghan ralbawi hlun 3 in AFP hnenah a sim.
Atu-ahin Ukraine ram sungah Afghan Commando ralkap an thleng zo ih Russia ih raldo hlawhfa dinhmun ral an do, rero, tiah theih a si.
Russia Defense Ministry zung in hi hlawhfa ralkap pawl hi thla khat ah US Dollar 1500 pek an si ding thu le an innsang khal Afghan ram ah kuat loin an nuntu khawsaknak tawlrelsak an si ding thu a sim.
A ngaingaite ahcun Afghan Commando ralkap hlun pawl hin Ukraine ram buainak ah tel an duh lo zet nan, hril ding lamzin an neih lo ruang men ih hramhram ih feh an si thu Afghan ralbawi hlun pakhat Abdul Rauf in a sim.
Afghan Commando hi ziangzat teu an um ti theih a si lo nan, Russia hin mi 400 hrawng a cah bet ding, tiah theih a si.
Leave a Reply