USA, Illinois ramkulh, Chicago khawhnar Highland Park ah July 4 ah Independence lawm ih lamzawh puai an tuah laiah inn luanglu ihsin misual pakhatin meithal in a kap ih mi 6 an thih hleiah hriamtuar tam zet an um, tiah Reuters thuthang cun a tarlang.
Acozah lam cun hi meithal kahnak ah mi 6 an thi ih mi 24 hriamhma an tuar, tiah an sim. Sizung ih thuphuangtu pakhat cun mi 31 hriamtuar an um, a ti thung.
Mipi lamzawh puai an thok ih minute 10 hrawng a rei ah kahawknak a thleng ih lamzawh puaipi khal an cawlh phah, tiah BBC cun a tarlang.
Kahawknak a suah hnuah Highland Park ih khuami pawl cu inn sungah um cio dingin le mah le innsang cio humhimaw dingin palik pawl cun forhfialnak an nei cih.
Thuneitu lam cun kahawknak a thlennak hmun ah Rifle meithal pakhat an hmu ih an zoihnit vivo tikah rinhmai deuhmi kum 18-20 ih upa Mirang pakhat, meikhal keng lai an hmu ih tihnungza a si thu palik pawl cun an sim.
Misual hin inn pakhat luanglu ihsin suk kah in mi a run kap, tiah palik lam cun an nemhnget.
“Meithal zun 20 ihsin zun 25 hrawng puak awn kan thei. Curuangah pistol a si thei hrimhrim lo,” tiah khuami pakhat Miles Zaremski cun Chicago Sun-Times hnenah a sim.
US ramsung ahhin tu le tu mibur lakah kahawknak a thleng leuhleuh.
May 14 laiah New York, Buffalo khawpi ah midum veng ih Super Market ah kum 18 mi Mirang pakhat cun miphun huatnak ruangah mi a kap ih mi 10 an thi.
May 24 khalah Texas ramkulh, Uvalde khawpi, Robb tualleng tlawng ah kum 18 mi thotho in mi a kap ih tlawngta 19 le sayama 2 an thi fawn.
Leave a Reply