UN ah U Kyaw Moe Tun kum khat a pehzom hrih ding

UN ih Myanmar palai dinhmun cuhawknak ruangah caan tawkfang laklawh zetin tthuktthun a si ih atu ahcun UN Credentials Committee in NUG palai U Kyaw Moe Tun cu kum khat tuan bet dingin a caan an dirhsausak, tiah theih a si.

NUG ih neihmi PVTV thuthang cun UN hin SAC ralhrang ih retmi palai hnong in U Kyaw Moe Tun an hril sawn, tiah a tarlang.

Credentials Committee hin official in thusuah an neih hrih lo nan, amah ret hrih a si thu U Kyaw Moe Tun cun VOA English Programme ah a sim.

A thokpek ihsin Credentials Committee hin U Kyaw Moe Tun thotho ret pehzom dingin an lungkim ko nan, Russia in a elkalh ruangah tuvekin an khawtlai phahnak a si, tiah Al Jazeera thuthang cun a sim.

Myanmar palai U Kyaw Moe Tun hi NLD aozah san laiih retmi a si vekin 2021 SAC ralhrang in thuneihnak an lak tikah Myanmar mipi lamah a ttang cih.

Curuangah SAC ralhrang lam cun a tlak thei dan ding, ta rori an ruat. Cuhleiah hringhronak phunphun a tuar ih a nunnak laksak ding tiangin an zuam.

Atu ahcun UN ih Myanmar palai tohkham an lawngtermi cu U Kyaw Moe Tun in kum khat sung a luahsal ding, tinak a si.