UK ram cun tuni July 4 (tlawngkainikhat) ihsin thok in hliakhlainak an neih ih tha an tidan vekin ni 4 sung hnatuan ih ni 3 sung cawlh la dingin hnatuan dan an thlengh thlang ding.
Hi hnatuan dan thar hi Company 70 hrawngin an thok ding ih leitlun company hnatuannak pawl lamhmuhtu a si, an ruahsan zet.
An hliakhlai dan le hnatuan dan thlengh danglamnak cun regular hnatuantu pawl in zarh khat sung an hnatuan caan ih 80% cu an tuan man thotho ding ih thlahlawh khal tumter cuang loin an ngah kel an hmu thotho ding, tiah an sim.
Hnatuan dan thar an thlengh dingmi cun rah tha sawn a suahpi an zum ih Oxford le Cambridge phunsang pawl ih mithiam pawl, US ih Boston College ih mithiam pawl le Think Tank Autonomy pawl tangkop in an tawlrel ding.
Hi hnatuan dan thar an zirzoinak ahhin zung thenkhat, tlawmngai hnatuannak pawl, nga zuarnak le alu kionak dawr pawl tiang a huaptel.
London saklam, Tottenham ih Presure Drop Brewery dintu Sam Smith cun company tin hin hnatuan dan bangaw lomi pawl bangawter dingin caan remcang zet a si, tiah a rel ih pulhhri ruangah an hnatuannak ah nitinten harsatnak an ton thu le ziangtivekin hnatuan caan her danglam sehla tiah a ruah rero thu a rel.
Company pakhatih hnatuantu Clare Doherty khalin hi hnatuan dan thar an zingzoimi hi a tha zet ding, tiah a sim ve.
UK ram hnatuantu mipum 3000 pawl an hliakhlainak ah an hmuhsuahmi cu tha an ti zet ih Ireland, USA, Canada, Australia le New Zealand pawl khalah hliakhlai pehzom vivo an tum.
“British ih hliakhlainak hi thuanthu rotling a si,” tiah Global 4-day week project hohatu Juliet Schor le Boston College ih pursum leilawnnak mithiam cun an sim.
Leave a Reply