Myanmar aiawh UN palai U Kyaw Moe Tun cun SAC ralhrang ih kaih le hrem, thahnak ihsin Myanmar mipi pawl humhimnak hrangah Responsibility to protect (R2P) bomnak a dilsal.
U Kyaw Moe Tun cun UN a mawhthluk ih Myanmar mipi pawl humhim ding hin R2P rak dil zomi a thlah duh lo ruangah a tuanvo a hlensuak lo, tiah a rel.
Atu Myanmar dinhmun ahcun ramsung thuneitu cun a ram mipi pawl kilhim loin tih le thlaphang in a tuah sawn. R2P ih hnatuan a simi le milai canvo humhimnak hrangah a rang thei bik in le lailanten ralhrang parah thungrulhnak tuah lohli dingin June 24 ih UN Assembly ah R2P thawn pehparaw in tonkhawmnak hmun ah a sim.
R2P hin an cangvaih duh dingin minung ziangzat meng ih nunnak so an pekhlanawk tul lai, tiah U Kyaw Moe Tun cun a sawmngiar hrih.
US tel in leitlun ram hruaitu pawl hin UN Security Council ih hmalaknak a neih theumi R2P cangvaiter dingah an thlahthlamaw sual rori, tiah a sim vulvo.
SAC ralhrang ih Myanmar rampi thuneihnak a lakmi dokalh ih mipi lamih dingtu U Kyaw Moe Tun cun Myanmar mipi pawl hin R2P ih bomnak vei sawmsahra dilngennak an nei zo nan, tuni tiang an uksak duh lo ruangah poi a ti thu a rel.
UN ih hohanak in Independent Investigative Mechanism for Myanmar (IIMM) telin UN Human Rights pawlkom hin Myanmar ralhrang ih cangvaihnak pawl an thlir cuahco ih mi that lainawng an si rori tiah an hminsin ko nan, tuni tiang hmalaknak ngaingai hmuh ding a um lo.
Leave a Reply