Myanmar rampi thuneihnak latu SAC ralhrang hotu pawl cu Turkey ram thuthennak zung ah thubuai orhter dingin June 1 ihsin zingzoinak an thok rero, tiah NUG ih Human Rights Minister U Aung Myo Min cun a sim.
Turkey thuthen zung ih suahpi dingmi thubuai tawlreltu hi Myanmar Accountability Project (MAP) an si ih annih cun sualmawhtu hmin cazin pawl thuthennak zung ah report-nak an nei ding ih ramdang palik pawl in sualmawhtu pawl cu ra kai dingin dilnak an thehlut ding, tiah a sim.
“SAC ralhrang mangpa Min Aung Hlaing ihsin thok ih a sungtel ralhrang hotu pawl an sual tuahmi zingzoi in an tawlrel thok thlang ding.
SAC ralhrang cu ramleng thuthennak ah thubuai thlen theinak sangka onsak a si vekin ramsung khalah thubuai thlen theinak zinkong dap vivo a si ding,” tiah Minister U Aung Myo Min cun a sim.
SAC ralhrang cun Myanmar rampi thuneihnak a lak ihsin rammi pawl parah hleihluat zetin kaihhremnak (Torture), milai, miphun mangmitternak (Crime Against Humanity) timi sirhsan in thubuai tuahsak dingah Turkey thuthennak zung cun a pomsak zo.
Universal Jurisdiction hin sualmawhnak tuahtu pawl cu zo an si khal le daan vekin thubuai tuahsak a thiang ih cohlannak, zingzoinak le thuthensaknak an nei thei, tiah U Aung Myo Min cun a simfiang hrih.
Tu dinhmun ah SAC ralhrang thubuai orhter dingin ramleng thuthennak zung hmun hnih in an cohlang thlang. A hmaisa cu Argentina a si.
Argentina thuthennak zung ahcun Rohingya miphun pawl mangmitter duh ruangih thah cimihnak thubuai a si ih an tawlrel rero zo.
Rohingya miphun parah Min Aung Hlang le ralhrang luban lam ih cangvaihnak pawl cu ICC ah thubuai net ti nei loin a feh rero lai.
NUG cun 2022 kum cem hlanah French, Australia le Asia nisuahnak ram pawl ah SAC ralhrang thubuai orhter dingin hma a la vivo ding, tiah theih a si.
Leave a Reply