Kum 22 mi veve Joe Matthews le Jess Peak tei’ duhdawtnak thuanthu hi a danglam zet.
Annih pahnih hi nauhak kum 4 mi an si lai, Tualleng tlawng (nursery) an kai laiah a lemlemten neihawknak an rak tuah dah.
Himi laiah hin neihawknak lemlem tiah zunghruk cu an rak peaw lo.
Tualleng tlawng an theh hnuah Joe Matthews le Jess Peak tei’ pahnih cu hmuaw nawn loin kum 14 sung mah le lamzin ah an feh.
Joe le Jess te hi Tualleng tlawng an rak kaitlang lai ihsin an rak ngaiaw cia, tiah Jess ih nu in a sim.
Thawhhlam an eitlang, an lektlang theu. Birthday party an tuah khalah an sawmaw theu ih an pahnih hin hmun dangah an date-aw theu, tiah a nu cun a sim.
Joe hi August thla ah a suak ih Jess hi October thla ih suak a si ruangah Tualleng tlawng ah Joe a kai hmaisa sawn.
Kum 14 sung an pehtlaihawk nawn lo hnuah Joe cun Jess cu Facebook ah a hawl hmu ih ca a kuat.
Joe cun, “I thei lai maw, zo ha ka si?” tiin ca a kuat. Jess khalin, “Thei lai ee, kum 4 ka si laiih ka neihmi pasal kha na si ko ti aw,” tiah a sawn ve.
Cutin an beaw, an ngainaaw vivosal ih tonawknak caan remcang an tuah hnuah an tongawsal.
Joe le Jess cu Joe tei’ inn ah an feh ih a nu le pa le thawn tonkhawmawknak puai tla an tuah, tiah Jess in a sim. An nauhak laiih video hlun le thlazuk pawl an bih kual vivo.
Nikum August thla ah Joe cun Beckley Point ih luanglu ih room pakhat sang in Jess cu neihawk a sawm.
Carpet sen phahmi zawh in an pahnih ih zuktlangmi pawl zuk pawl a tar. Joe cun a kuttang hnatuantu ko in, “Marry Me” timi cafang tum zetih nganmi a suaiter. Himi khal a tar vengveng.
Joe le Jess tei’ pahnih cu hmai thla ah Rickbeare Manor ah hlunghlai zetin neihawknak an tuah ding, tiah theih a si.
Leave a Reply