Training kai dingih feh PDF 9 ralhrang in that

Sagaing ramthen, Shwebo peng, Wetlet GZ ih PDF 9 pawl cu June 29 ahkhan SAC ralhrang in an kai ih an that, tiah Wetlet GZ pawlkom ih hotu cun a sim.

SAC ralhrang ih thahmi PDF 9 pawl cu nunau 4 le mipa 5 an si ih sivai tuamhlawmawknak training kai dingin Aung Si khua an fehnak ah an kai ih an that tiah theih a si.

“Nunau pali le mipa panga an si. June 29 ah training kai dingin kan thlah ih Aung Si khua fehnak Tantaing kel tiang kan thlah hai.

Nitlaknak lamih pawlkom dang pawl kan phone ih an fehnak ding a him le him lo kan suhsak ta.

Tantaing kelnak timi cu Shwebo-Mandalay lamzin ah a um. Kan nau le hi Aung Si tiang feh ding an si. An feh hnu minute 35 hrawng a rei tikah kan phone ih ralhrang in an kai ti kan thei. Rawl khal pumpuar in kan ei thei nawn lo.

An phone khal an laksak thluh. Khatlam pawlkom pawl cun an check laiih an tong awn pawl kan thei, an ti. ‘An thilri zoh tha uh, meithal teh a tel maw,’ tivekih an biakawk lai kan thei,” tiah Ko GZ cun a sim.

Lehhnu an theih vivo dan ah an kaihmi PDF pawl hi Aung Si khal thlen man loin Tantaing kel ih hmunkhuar ralhrang pawl in Palaing tlawnginn ah an kharhkhum hai. Hitawk hrawngah hin SAC ralhrang pawl an umnak kum 1 lai a rei zo, tiah Wetlet GZ cun an sim.

“Nauhak pawl Palaing tlawnginn ah an lut. Meithal awn khal theih a si. Palaing timi cu an fehnak ding a si lo. An fehnak lamzin ding cu Minchan khua an thlen in nitlaknak lamah an pial dingih cutin Aung Si a si ko.

Pial loih an feh lan vivo asile Kuatseik an thleng ding. Kuatseik ihsin Paliang ah an lan vivo ding.

Nauhak pawl hi zohman a feh dah an um lo. An lakah Aung Si khua theitu cu mi 4 hrawng an si ding.

Curuangah khatlam PDF kan theihter ih rak hmuak hai dingin kan cah. Cutin Tantaing kel tiang thin hnangamten kan thlen ih kan kirsannak a si.

Netabik kan theih dan ah mi pakhatin Palaing lamah a hruai, ti a si. Palaing le Tantaing kel hi minute 35 lole 40 hrawng feh a si. Asinan kan nau le pawl cu minute 15 hrawng an feh tikah lamzin ah ralhrang in an rak kai.

Thuthang phunphun a suak. Mi 2 an thlah, mi 3 an thlah ih midang cu an that, tivekin. Asinan kan zum lo. Atu ahcun khur pakhat sungah uico ralhrang pawl in mi 9 an thahmi zuk an post mi kan hmu,” tiah GZ pawlkom hotu cun a sim.

Ziangtitin PDF 9 pawl hi Palaing khua lamah an feh timi hi Wetlet GZ cun an zingzoi rero lai.

SAC ralhrang in an thahmi pawl cu kum 14 mi Ma Pa Pa Khaing, kum 15 mi Ma Win Ein Kyaw, kum 24 mi Ma Naing Naing Aung, kum 34 mi Ma Thit Thit Hlaing, kum 17 mi Ko Phu Taung, kum 17 mi Ko Phaung Kyaw, kum 21 mi Ko Thein Thein Oo, kum 27 mi Ko Aung Kyaw Myo le kum 27 mi Ko Phu Nyein an si.