Rakhine ramkulh, Maungdaw peng ih tlawng uktu sayagyi le sayama pakhat cu an hlo ih rukmi (kidnap) an si, tiah pengpi fimthiamnak zung cun thu an suah.
An rukmi sayama Ohmar Kyaw cun phone ihsin Maungdaw fimthiamnak tlangbawi U Aung San Kyaw in June 17 ah a rak biak thu amah U Aung San Kyaw cun a sim.
“Sayagyi U Bo Win thawn khal kan beaw ko. Cule rukmi (kidnap) an si thu in rak sim. A rutu pawl hi Bangali tong an hmang. An rukmi tlennak dingah ting 50 an phut,” tiah U Aung San Kyaw cun a sim.
An rukmi hi Maungdaw peng, saklam Taungpyuletwei khawpi ih Tinbawhla khua, phun riat tlawng uktu kum 34 U Bo Win le a kuttang sayamaa kum 27 mi Daw Ohma Kyaw an si.
A rutu pawl hin Myanmar tangka si loin Bangladesh tangka Taka ting 50 an phut ih Myanmar tangka cun ting 1000 hrawng a si.
Hi rukawknak le an sumpai phutmi thu thawn pehparaw in rukmi innsang lam cu thurelkhawmnak an nei rero lai, tiah U Aung San Kyaw cun a sim.
Annih hi June 16, sun hrawngah Tinbawhla khua ihsin Maungdaw khawpi pan in an rualpi midang pawl thawn an feh laiah ne khortu an si ih Yinpyinchaung khua kiangah an hlo.
Atu dinhmun ah tualsungmi pawl le ramri kiltu palik thawn minung 500 kiangkapin an hawl rero.
Sayagyi le sayama cu ruk an si ih an hruainak lamzin ah ca poimawh, bag le kedam pawl an hmuh thu a hawltu pawl in an rel.
Leave a Reply