Rakhine ramkulh, Maungtaw peng ih tlawng saya pahnih rukmi cu tuni June 23 zinglam ah an suah zalen zo, tiah theih a si.
Ruk (kidnap) mi tlawng saya pahnih cu Tinbaw Hla khua ih phun riat tlawng sayagyi U Bo Win le sayama Daw Ohma Kyaw an si ih an pahnih in June 23, zinglam ah Bangladesh ram, Cox’s Bazar District, Nat tivakap ih Arakan miphun pawl umnak Chanchaung khaw kiangah an hmu.
An pahnih in an umnak kel an thlen theinak dingah an tawlrel rero lai, tiah theih a si.
“An pahnih in an suah zalen zo. Atu ahcun Bangladesh ram, Arakan miphun pawl umnak Chanchaung khua ih upa pawl in an kilhim lai,” tiah phungki pakhatin a rel.
An pahnih hin an innsang lam thawn tongaw thei dingah Maungtaw peng, Khakhu lam ihsin kawh tlun an tum, tiah theih a si.
Tlawng sayagyi U Bo Win le a kuttang sayama Daw Ohma Kyaw ih June 16 ah Tinbaw Hla khua ihsin Maungtaw pan in bike ih an feh laiah rukmi an si.
Cumi hnuah a rutu lam cun Bangladesh tangka ting 50 in tlen dingah Maungtaw ih Education Officer hnenah phone in an rak sim.
Cutin khatlam khatlam thureltlangnak nei in ting 30 in relremnak an nei, tiah theih a si.
Tlawng sayagyi U Bo Win le sayama Daw Ohma Kyaw cu an hlohnak ni 8 rei hnuah atu vekin an suak zalennak a si.
Leave a Reply