Iran ram laifang Tabas khawpi kiangah June 8 ahkhan tlangleng lamzin sir ih leilung laihnak cet cu tlangleng in a pah ih a lamzin ihsin pial in cangsualnak a thleng.
Tlangleng totu mi 17 hnakih mallo an thi ih mi tam zetin hriamhma an ngah, tiah Iran thuthang sirhsan in theih a si.
Hi tlangleng hi saklam-nisuahnak khawpi Mashhad ihsin poksuak a si ih khualtlawng 348 a phur. An ram nazi 5:30 hrawngah nelrawn ramcar a run paltlang ih leilung laihnak cet pah ngah in tuvekin vanduai an tonnak a si.
Mi 17 hnakih mallo an thi ih mi 86 in hriamhma an ngah. Cumi lakin mi 37 cu sizung lamah an phur thu an ram thuthang suahnak in a phuang.
Hriamhma ngahtu thenkhat hi an roh tuk ruangah mithi cazin a karh men thei an ti fawn.
Mina phur motor 24 le helicopter 3 in mina le mithi pawl an thiarsuak rero.
Tlangleng cun leilung laihnak cet a pah ih tlangleng khan khat ihsin khan nga tiang lamzin ihsin an pial, tiah an sim.
Tlangleng cangsualnak cu thuneitu lamin an zingzoi rero ih minung 13 an kai zo.
Leave a Reply