Thukham maksak zet tuah in an neiaw

July 9 ahkhan India ram ah neihawknak maksak a thleng.

Mopa Mintu le monu Shanti tei’ pahnih cu thukham danglam zet tuah in an pahnih lungkimnak hminkar rori in an nemhnget.

Cui’ an lungkimtlangmi thukham cu, “Thla khatah vei khat Pizza ei ding. India rawl a simi Ghar Ka Khana ei tengteng ding, himi ei duh loin nuar lo ding!

Nitin Saree hruh ding. Zan party a um caan ah feh awihawk ding, asinan nupa tengteng ih feh ding. Gym nitin lek ding. Zarhpini tinten tum banaogay ei ding. Party feh caan ah thlazuk mawi zet zuk ta ding. Ni 15 dan ah shopping feh theu ding,” tivek pawl an si.

Thukham (cachuk) ahcun tuah ding le tuah lo dingmi pawl cahnah khong zet parah monu le mopa cu hmin an kar. An thian veve khalin theihpinak hmin an kar ve, tiah theih a si.

An neihawknak cu hlunghlai zetin an tuah ih pangpar pawl in an ceibawl. Thukham maksak zet pawl hi monu lam ih saithawtmi tiah an rel ko nan, mopa khalin a lungkimpi tukah a hni sese ko.

Hi thukhamnak (cachuk) cu daan vekin fehpi a si lo nan, Mintu le Shanti hrangah in le ei, tlanlen dan le hnipuan hruh dan pawl an pahnih hrang lungrualnak hmuhsaknak ih an tuahmi a si.

Mintu le Shanti tei’ nupa cu July 9 ahkhn India ram, Assam ramkulh ah an neiaw.