Thinlung kim lo a fapa in phaihlai in a Nu a talh that, amah khal a thi cih

Mon ramkulh, Thaton peng ah thinlung kim lo a fapa in a suahnak nu phaihlai in a vuak ih a nu a thi, tiah theih a si.

A liam zomi June 8, simlam ahkhan Thaton peng, Pat Taw Mu uksuh, Ying khua ih um Daw Ngui Zin kum 74 cu thinlung kim lo a fapa in phaihlai in a talh that, tiah theih a si.

Cumi hnuah a fapa khal cu a nu a thih a hmuh tikah a lau ih a thi cih ve, tiah tualsung tlawmngai pawlkom in an sim.

Zan nazi 1 hrawngah milai authawm kan thei. Innhnen pawl kan sawmkhawmaw ih an inn ah kan va feh. Daw Ngui Zin cu a fapa thinlung kim lo ih a vuaknak hriamhma tuar loin a thi kan hmu. A fapa khal a her lualo ih a tlu tupti ih a thi cih, tiah an sim.

Atufang ah hi thihnak thubuai ah palik sakhan lam cun ziangtiih hmalak ding a si, tiah an tawlrel rero lai tiah theih a si.