A taktak ih cangsuak thei lomi le beiseinak lawnglawng rel nawn lo dingin NUG ih Acting President in a kuttang milai pawl ralrinnak a pe, tiah theih a si.
Mipi in in duh vang seh, tiin a taktak ih cangsuak thei lomi le beiseinak men lawnglawng zohman sim lo dingah le cuvekah kaa cip thiam dingin NUG ih Acting President Duwa Lashi La cun tuni November 30, Cabinet meeting ah a kuttang milai pawl a cah hai.
November 30 zinglam ih tuahmi a tum 76nk NUG acozah meeting ah atu vekin thu a cah ih NUG thuthang thannak in a tarlang fawn.
Himi thu ah ziangvekih an tong ruangah ralrinnak a pe, ti le zo vek pawl ih tongmi parah ralrinnak a pe, timi lawngte thuthang ahcun an tarlang lo.
Cu hleiah mipi ih lungput hi a sang le niam, thathawh caan le beidong caan an neih vekin mipi lungput theihthiamsak khal a tha, tiah Acting President cun a sim hrih.
Hi tonkhawmnak ah Union Prime Minister Mahn Win Khaing Than khalin thucah a sim ve ih ramdang palai zung lam khalin ramdang bombawinak pe theutu International Donor thawn tonawk an tum thu, an rel ve, tiah theih a si.
Leave a Reply