Thantlang palik sakhan la, Chin ralkap 1 nunliam

CNA/CDF tangrual in Thantlang palik sakhan an laksak, tiah theih a si.

February 8 zan ah Chin ramkulh, Thantlang khua ih SAC ralhrang kuttang palik sakhan pakhat cu CNA/CDF tangrual in an luhhnawh ih an laksak. Meithal zun 40 lenglo, Drone kahnak thilri le a dang thilri tam zet khal an laksak thei, tiah theih a si.

February 8 zan, tuan deuh ihsin CNA/CDF in dorne in bomb an thlak hmaisa ih zan nazi 10:00 ah ke in an siim hnuah sakhan an laksak thei.

Hi sakhan laknak ah ralhrang lam ziangzat an thi, timi theih a si lo ih CNA ralkap pakhat Lt. Aa Thang timi in nun a liam, tiah theih a si.

Lt. Aa Thang cun a dam laiih a tongmi cu, “Ka khukhri rual dothlengnak ih pumpe lo an tam tuk lai. Kei hi dothlengnak ah ka thih khal le a poi lo. Ram le miphun hrangah nun pek ka siang tuk ko,” tiah a sim ta tiin CCN in a tarlang.