Thailand ram cun video Live thlahtu le thlazuktu pawl thawn pehparawmi daan thar pakhat an tlangthan thlang ding, tiah theih a si.
Daan hmin cu Personal Data Protection Act (PDPA) ti a si ih a sullam cu bulpak humhimawknak hrangah ti a si. Hi daan thar hi June 1 ihsin an hmang thok thlang ding.
Personal Data Protection Act (PDPA) ih a tumtahmi bik cu Thailand ramsungah video ih ‘live’ thlah tikah siseh, mahte thlazukawk (selfie) caan ah siseh, dunglam ih langtu a pehparaw lomi mipi lole mi pakhatkhat kha an siannak tel loin langter awih a si lo ding. Mi pakhatkhat in a langnak kha amah suthlam ih a siannak lak ta loin video le thlazuk ah telhsak asile thuṭhennak zung ah cu nu/cu pa cun a hek thei, ti a si.
Video live thlah tikah thlazuk caan ah hmel theih lo midang an lang pang asile anmah siannak lak hnu lawngah post awk fang ding, tinak a si cu!
Cutin dunglam ih a rak lang pangtu pawl cu anmah ton an harsat asile an langnak an hmel kha rauter (blur) asilole sticker thawn huhphensak ding a si, tiah an daan thar ruangzingmi ahcun an telh.
Hi daan a thlun lotu cu US Dollar 1500 ihsin 165000 asilole Thai Baht ting nga (500000) ihsin million 5 (5000000) tiang cawhkuanter theih an si ding.
Zo cio khal video ih live thlahtu siseh, thlazuk post tu siseh fimkhur a ṭul ih mi ih live thlahnak le thlazuk post-nak ah na rak tel pang a si khal le na siannak la ta loih an post-awk tikah thuṭhennak ah na hek thei, tinak a si.
Leave a Reply