Thailand ah Thai hmatpungtin lem, Embassy motor lem le ralkap uniform lem thawn China pa an kai.
Thailand ah Thai hmatpungtin lem kengtu kum 33 mi China pa cu Thailand palik in an kai ih a hnen ihsin Embassy motor thawn bangaw dingih tuahmi private motor, security palik pawl ih hmanmi bike lem le ralkap uniform lem khal an hmuh thu theih a si.
‘Shao Xiaobo’ timi China pa hi Bangkok khawpi, Sutthisarn Apartment ah November 8 ah an kaih thu Thai palik bawi Phanthana cun a sim.
November thla sungah Thailand ih tuah dingmi Asia-Pacific Economic Cooperation (APEC) hohatu pawl tonkhawmnak an neih hlanah palik pawl cun daan khoh zetin an rinhmaimi pawl an hawl laiah an kaihmi a si.
China pa cun a hmanmi Thai hmatpungtin cu a lem a si lo thu a rel. Mi pakhatin hmatpungtin lem a zawrh nan a lei duh lo thu tiangin a sim.
Asinan a umnak an zohfel tikah Embassy motor lem, palik bike lem le Thai ralkap uniform an hmu vivo. Cu hleiah thli meithal 6 khal an kai, tiah palik bawi cun a sim.
China pa cun anih hi sumdawng a si thu le pursum leilawnnak nei dingin Thailand a luh thu a rel ko nan, a cahlap neihmi pawl an zoh tikah zianghman tuansuakmi a neih lo lawng si loin a zaten a lem hlir an rak si.
Atu ahcun thil sual dang a tuah le tuah lo, Thai palik in an zoihnit rero lai, tiah theih a si.
Leave a Reply