Thailand rawlhmeh tuah dan phun khat Kebabs ei sual ruangah Thai Social Media ih laar zet Arisara Karbdecho cu a thi, tiah theih a si.
Anih hi Marh thla ah sizung ah tuamhlawm a si ih June 6, sun nazi 12:50 ah a thaw a cem, tiah a innsang le a rualpi pawl in an nemhnget.
A rualnu Sirikanda Chaiburut cun, “Arisara thih thu theitu hmuahhmuah in kan thin a nuam lo zet. Dam dingin thla kan camsak rero ih ziangaw kan titha. Anih hi taksa nonal zet le duhnung a si hleiah rualpi nuamtertu a si,” tiah a ui thu a rel.
Arisara cu mi tampi cun ‘Alice’ tiin an thei ih kum 27 lengdawh a si. Hi model hminthang zet cu ceiawknak lampang thehlartu an an hmang ih sumlut a nei tha zet.
Hnipuan hruh dan a thiam ih Pokemon T-Shirt hruh in thawveng zetin a um thiam ih mi mit a la zet.
A hminthan lehnak pakhat cu Alice hin online ihsin a zuk a post ih zarh thum sungah a rihnak pound 21 tlater dingin a zuam. A zuam vekin a tuah thei taktak.
Vanduai a tonnak bik cu a nu Supicha kum 57 mi in Thailand nunphung rawlhmeh voksa Kebabs le fangtlor a kaa khatin a barh ih vaksa tit pakhat cu a thawthawtnak zin ah a feh sual.
Cutin vansanglam ih a talbuai tikah sizung an pan cih nan, sibawi pawl cun, ‘Minute 9 nan tlai, a thluak ah oxygen a catlak zo,’ tiah an rak sim. Asinan sizung ah tuamhlawm a si thotho ih hmanseh thla hnih rei hnu June 6 ah a thaw a cem ta riai.
Arisara nu cun a fanu thih thu ah a thinnuam lo zet. Voksa a ei sual lawng si loin a rihnak a tlakniamter tuk ruangah a taksa in nat dokham theinak thazang a tlasam, tiah a puh.
Curuangah tleirawl pawl hnenah harhdamnak ngai poimawh a tulzia, caan dikten rawl ei a thupitzia le cawlhhahdam a tulzia pawl forhfialnak a nei.
Leave a Reply