TGR Women Drone Force hotu Kyar Khin Sein (ကျားခင်စိန်) ih thuanthu

Cangsualnak ruangih tuahmawhaw TGR Women Drone Force hotu Kyia Khin Sein (ကျားခင်စိန်) cu raldosal dingin a timtuahawsal, tiah theih a si.

ကျားခင်စိန်  telin dothlengnak ralkap 4 hi October 13 ah Sagaing ramthen, Myaung peng ih SAC ralhrang cet long bomb puah ih pilter dingin an zuam laiah an cangsual. Drone ih bomb an bun laiah a puak ih an kut par rori ah a puak.

Hi ttumah Drone 3 hman an tum nan, 2 a siat ih 1 lawng a tha. TGR Women Drone Force hotu ကျားခင်စိန်  cu a kut le a hmai, a ke pawl ah hriamhma a ngah ih zarh hnih sung tuamhlawm a si.

Atu-ahcun kianghrol in maltete a feh thei zo, tiah an sim. Anih cun, “Dothlengnak hrangah ka nunnak a tang lai,” tiah a sim.

Tu hrih ahcun a hriamhma ruangah tthittha in a vaksuak thei lo nan, October thla cem ahcun raldo thei ka beisei, tiah a thinlung pau-khoh thu a rel.

Bomb puak ruangah ကျားခင်စိန်  ih hmai ah hriamhma a tuar, tiah theih a si. “A hlanih hmelthat tum lai sisehla ka pamhmaiaw zet ding. Asinan dothlengnak hrangah hmelthat hi a thupi bik lo,” tiah ကျားခင်စိန်  cun a sim hrih.

TGR Women Drone Force hotu ကျားခင်စိန် thawn hriamhma ngahtlang mino 3 pawl khal atu-ahcun an hriamhma ziaum lam an pan thlang, tiah October 27 ih thu an suhnak ah a rel.

ကျားခင်စိန်  hi kum 25 lawng a si ih nunau dothlengnak thuanthu ah hminthang zet le raltha zet a si. Amai’ kaihruainak in mission 20 lenglo an nei zo, tiah TGR Women Drone Force hnen ihsin theih a si.