Kum (60) hrawngih upa Thantlang khawpi hmel mawitertu Thantlang Baptist biakinnpi cu June 9, simlam nazi 4:30 hrawngah a kang, tiah Church Vice Chairman le khuanu khuapa hotu pakhatin an sim.
TBC Vice Chairman U Lawm Bik cun, “Tuni simlam nazi 5:30 ah khawsung ih um mi 2 in hi thuthang in sim. A kiangkap khua a simi Thlualam le Congthia lam kan sut bet tikah biakinn a kang thu a fiang sinsin,” tiah a sim.
Atufangah Thantlang ahhin ralhrang thawn kahawknak a um lo nan, tuvekin biakinn a kang thotho.
TBC ahhin sungtel innkhi 600 lenglo an um ih Thantlang khawpi ah a tum bikmi biakinn a si ih Thantlang khawpi mawitertu pakhat a si.
SAC ralhrang in Myanmar rampi thuneihnak an lak hnuah Chin ramkulh, Thantlang khawpi sung inn 1200 lenglo an urkang hleiah biakinn 11 lenglo khal an urkang fawn.
SAC ralhrang in Thantlang biakinn a urkangsakmi pawl cu a tanglam bangtuk an si.
1. Thantlang Centenary Baptist Church (TCBC)
2. Church on The Rock (COTR)
3. Presbyterian
4. St.Nicholas Catholic
5. United Pentecostel Church
6. Assembly of God
7. Methodist
8. Gospel Baptist Church
9. Holiness
10. Johnson Memorial Baptist Church
11. Thantlang Baptist Church
Leave a Reply