Suu Kyi suahcam ah 'Happy Birthday...' tiih post-tu palik bawi an kai

Daw Aung San Suu Kyi ih suahcamni ah Birthday duhsaknak ngantu palik Sergeant pakhat cu SAC ralhrang in an kai.

Myanmar rampi thuron Daw Aung San Suu Kyi ih suahcamni ah Birthday duhsaknak ngantu Pathein palik Sergeant Thant Zin Oo cu SAC ralhrang in an kai, tiah khuami pawl in an sim.

Sergeant Thant Zin Oo cun Daw Aung San Suu Kyi ih Birthday June 19 ni ahkhan a Facebook Account ah ‘Happy Birthday, na nunkhua sau hram seh,’ timi a post. Asinan zoi’ hmin hman a tarlang riai lo. Hmanseh June 21 ah an kai, tiah Pathein khuami pakhat cun a rel.

“Palik Sergeant hin Birthday duhsaknak post mi cu SAC ralhrang Lobby Han Nyein Oo in Telegram ah a post sawng. Cin le daan mumal um loin ralhrang hi an cangvai a si bik,” tiah palik tuan lai mi pakhatin a rel.

SAC ralhrang Lobby Han Nyein Oo cun, “Pathein ih palik sergeant Thant Zin Oo, zo ih Birthday hrangah maw duhsaknak ca na post timi sut hnik uh. Catluan pakhat ruangah na nun pumpi siat na duh mawsi,” tiah a hringhro.

Palik Sergeant Than Zin Oo cu kaih a si ih a innsang pawl khal palik umnak ihsin an dawi, tiah theih a si.

Daw Aung San Suu Kyi ih hmin a tarlang lo vekin thuhla felfai um loin tuvekih an kaih hi cu SAC ralhrang mangpa Min Aung Hlaing ih lungawinak dingah Pathein ralhrang pawl in an tuah hrimmi a si ko, tiah Pathein khuami pawl in an sim.