Myanmar rampi thuron Daw Aung San Suu Kyi cu Nay Pyi Taw thawnginn ih an khum ngah hnuah a hnenum mi 8 pawl cu Yangon, Bahan peng, University Campus lamzin ih a inn No. (54) ah an kuat hai, tiah NLD party lamin an sim.
July 4 ah Daw Aung San Suu Kyi ih umpimi minung 8 le a ui fim ‘Taichito’ tiangin Nay Pyi Taw ihsin Yangon a inn ah an kuat ih amah cu Nay Pyi Taw thawnginn hmun khawhar zetah SAC ralhrang in an khum.
July 5 ah Nay Pyi Taw ih Lah Yaung Taw project nawhthuh thubuai ah Daw Aung San Suu Kyi cu Nay Pyi Taw thawnginn sung Special Court ah an zoihnit, tiah theih a si.
Kan dungte ah Myanmar ram ih ra tlawngtu ASEAN palai Prak Sokhonn cun Daw Aung San Suu Kyi ton a duh thu a rel nan, SAC ralhrang in an siang lo. Cuhleiah a hlanih an retnak ah retsal dingin ASEAN palai hin a dil thotho nan, cu khal cu thli lakih voih thawh vek a si.
June 22 ih Birthday hmang kum 77 ih upa Daw Aung San Suu Kyi cu Nay Pyi Taw thawnginn ah room hranpaten saksak in an ret ih a thubuai neihmi pawl thawnginn sungah zoihnitnak an nei rero.
SAC ralhrang in Myanmar rampi thuneihnak a lak tikah Daw Aung San Suu Kyi cu thubuai 19 an orhter ih cumi lakah thubuai 6 hrangah kum 11 thawngtla dingin daantat a si zo.
Leave a Reply