Soe Win khualtlawnnak lamzin ah bomb an puah nan, an cang fuh lo

Shan ramkulh khawpi Taungyi ah SAC ralhrang hotu sangsuan Soe Win a tlawng ih bomb an rak puah.

Asinan an bomb puah hi second malte in a luan deuh ruangah duhthusam in ralhrang an thih lo thu SYM (UG) cun tuni June 24 ah thu an suak.

June 24, sun nazi 1:25 hrawngah Taungyi khawpi bazaar Traffic point kiangih Traffic palik pawl umnak zung ah ralhrang hotu sang Soe Win a rat ding ti thei in bomb rak puah a si. Asinan second malte tuan ih an puah ruangah sullam nei loah a cang.

“Soe Win ratnak ding lamzin ah ruahsannak nei zetin kan cangvai. Asinan second malte tuan in bomb a puah ruangah mipi pawl kan lo hmaisong zet. Hiti kan puahnak san khal sullam tam zet a um ruangah a si ih in theithiam dingin zangfah kan lo ding,” tiah SYM (UG) cun an sim.

Hi bomb puahnak ruangah siatsuahmi an um le um lo cu neta ah thuhla theihternak an neih ding thu an sim.

Lehhnu khalah SAC ralhrang dinpitu le an cangvaihnak pawl siatsuahsak dingin an zuam vivo ding thu le mipi pawl khal cuvek caan ah rak thiarfihlimaw dingin forhfialnak an nei hai.