Sivai ri in inn lam a tibuai theu ruangah a naupa in a sah that

Kachin ramkulh, Bhamo peng, Pauk Kone veng ah June 8 ah unau thukam elawknak ruangah laithahnak tiang a thlen phah, tiah tualsungmi pawl in an sim.

A thitu kum 24 mi Ko Nanda Si Thu @ Ko Phu Tha Gyi cu rittheih sivai tham a si ih a sivai ri in a innsang pawl a tibuai. Cutikah a nau Ko Phu Tha Lay cu a thinheng a supaw thei loih nam in a upa cu a sah that, tiah an sim.

Pauk Kone veng ih um nunau pakhat cun, “Khua a thim ih mina phur motor awn kan thei. A thitu hi rittheih sivai tham a si ih buainak a tuah theu. Palik pawl reipi hnuah an ra thleng ih nam ih sattu a nau an hruai. An kaihmi hi nupi naukeng a nei,” tiah a sim.

Buainak a suahnak hmun ah Bhamo ih mipi phur, tlawmngai pawlkom Yaw Hti Kaa pawl an ra ih mithi ruak cu Bhmamo senpi sizung ah an phur.

Mai’ upa sat thattu Ko Phu Tha Lay cu daan vekin hremnak pe dingah Bhamo peng palik sakhan ah hren a si.