Sir Lanka mipi pawl an ram hruaitu inn ah nuam an tawl

Sri Lanka mipi pawl cun an ram President le Prime Minister in an sinak an suahsan hlanlo an inn le lo cilbuai an bansan lo ding, tiah thu an suah.

Sri Lanka mipi pawl cu July 9 ahkhan an ram President le Prime Minister ruuninnpi an luhhnawh ih nuamtawl in an khawsa. Prime Minister ih a bulpak inn pakhat khal an urkang.

President le Prime Minister ruuninnpi sungah cun a then phe an lek, a then swimming pool ah tidai an leuh, a then rawl an ei ih a then an selfie aw ciamco hai.

July 10 ah mipi lam cun thu an suah ih President le Prime Minister in an sinak an hlihfelawk hnu lawngah an ruuninnpi an suahsan ding, thu an phuang.

Sri Lanka President cun July 13 ah a sinak ihsin a cawlh ding thu le Prime Minister khalin a sinak cawlhsan a duh thu theih a si.

Atufang ahhin Parliament chairman le political party dangdang pawl tonkhawmawknak an nei vutvo ih tangrual acozah din dingin an relkhawm rero lai.

Sir Lanka ram hin buainak pisirh an tong ih pursum leilawnnak a harsa, Dollar a catlak, petrol a um lo, sivai le in-ei ah mangtam a tlung, sumpai manmual a tlaniam, leiba torseng an nei ih bank pawl khalah sumpai a kangcat.

Curuangah mipi lungawi lo cun July 9 ah duhphorhnak an nei ih sihsen zat rori President le Prime Minister ruuninnpi ah luhhnawh ciamco.

President cu ralkap long in a tlanhlo, tiah theih a si.