Pursum leilawnnak siatnak tawpkhawk a thlen ruangah Sir Lanka mipi pawl cu an ram president ruuninn, prime minister ruuninn le acozah ruuninnpi pawl July 9 ah an luhhnawh rupro.
Curuangah an president Gotabya Rajapaksa cu ralkap longpi in a tlansuak, tiah theih a si.
Mipi pawl cu president ruuninnpi ah lut in swimming pool ah tidai an bual, lehpannak phunphun an tuah.
An ramsung political party zate telnak acozah pakhat sersuak dingin lamzin sial dingah mipi pawl cun an duh ih PM Ranil Wickremesinghe khal a tohkham suahsan dingin an duh thu an tlangau.
Mipi nuntu khawsaknak ruat in le dokalhtu party hruaitu pawl ih dilngennak cu lungkimpi an si, tiah Sri Lanka PM zung cun thu a suah ve.
An rampi president Gotabaya Rajapaksa khalin July 13 ah a tohkham suahsan dingin a rel thlang tariai.
President Gotabaya Rajapaksa hin July 13 ah a tohkham a suahsan ding thu Hluttaw chairman Mahinda Yapa Abeywardena in a phuang zo.
President lawng si loin PM Ranil Wickremsinghe le atufang acozah kaitu pawl khal an sinak bansan dingin political party leader le mipi pawl cun an nor rero ih an suahsan dingin thu a um zo fawn.
Atufang Sri Lanka ram dinhmun cu tho thei nawn lo ding khopin a soprop ih pursum leilawnnak a siat, sumpai manmual a tla, petrol le gas a um lo, in-ei a harsa ih mangtam a tlung, sivai harsatnak an tong fawn.
Curuangah ram mipi pawl cu rampi huap rori in duhphorhnak lungrual zetin an nei ih acozah innpi, president innpi le PM innpi pawl an siim ciamco.
Prime Minister innpi cu mizan ah mei an duah ih a kang vutvo.
Leave a Reply