Leitlun mipi ih theih hlawh zettu bawhlung sitthiam, pa khantling le hmeltha, international brand ambassador lar David Beckham cu Singapore ah a feh.
Hihi Adidas ih tawlrelnak in a si ih June 17 ah ‘We Got This Tlak Show 2.0’ timi titinuam thurelkhawmnak ah a tel.
Hi tititlangnak ahhin Singapore bawhlung sitthiam Ikhsan Fandi, huleng JD Jade Rasif le Christabel Chua@bellywellyjelly an si ih caankaitu (host) cu 987 JD Joakim Gomez a si thung.
Huleng Jade Rasif cun David Beckham ih cangvaih dan a uar zet thu a Instagram ah hitin a ngan. “Stage thianfai a si tikah hnatuantu pakhat cu tohkham pawl a thawn rero.
Cumi cu David Beckham in a hmuh tikah a va pan. David Beckham a suah lai ka hmuh tikah ka zoh thlun vivo ih anih cun tohkham pawl a va thiar bawm cu teh,” tiah a ngan.
Adidas ih tawlrelmi titi thunuam relnak ahhin mipi thawn tonaw dingin caan an tuaksak lo ih room sungih um vial lawngin an zukpi men.
David Beckham hin a hlanah cun mipi thawn tonawk a remcan lo ding thu Adidas Singapore cun social media ah an thlah ko.
Asinan David Beckham tong duh ih ratu mipi 250 hrawng cun Store room lenglam ihsin an rak bawh, ti a si.
Curuangah David Beckham cu lengah a va pawtsuak thotho ih mipi pawl cu cibaibuknak le thazang pe in lungawithu a va sim thotho, tiah an sim.
Leave a Reply