Siangbawi Hre Kio in a duhdawtmi Chin mipi hnenah cakuat ropi a ngan

Siangbawi Rev. Dr. S. Hre Kio cun tufang Myanmar rampi ih harsatnak a tuarpi le a hleice in Chinram ih tuarnak pawl seherhnak thawn ca a kuat.

Siangbawi Hre Kio cun SAC ralhrang in rampi thuneihnak a lak hnu thi le hriamhma ngah pawl a tuarpi ih ralkian ih hramlak ih relh pawl ruahsur le ciarbek, fikfa lakih caan hmang pawl a lainatnak a langter.

Cun Covid-19 natnak ruangih nunnak liamtu Chin pastor le Evangelist (80) pawl a uizia le an innsang hrang thla a camsak thu a ngan. A hleice in FBA GS tuan lai Rev. Vai Lain Zul, FBA vice president Rev. Tlei Thuan le CBANA Chindwin Vallay Mission Director Rev. Lian Ci te pawl in cu lo zetin mual in liamsan ruangah tuar thiam harsa a ti zet.

Hivek caan ahhin khawruahnak feh peng lo dingin a forhfial ih “Pathian in in hrem si pei maw? Pathian in hi bangtuk natnak le harsatnak hi a kham thei lo mawsi? Thla kan cam rero nan, damnak le daihnak a um cuang fawn lo. Pathian in kan thlacamnak a thei lo a si pei maw?” tiah amah khal a beidong thu a rel ve.

Asinan zumtu pawl cun Bawipa Jesuh Khrih ah ruahsannak kan neih ringring thu pawl in mi a hnemsal.

Zumtu cun a nung Pathian kan neih ruangah in thihsantu kan unau pawl hrangah hmun a remsak ih Bawipai’ tangnem ah an thleng ding, ti kan fiang ruangah hi khawvelmi bangin riahsia le thinhar in um lo dingin forhfialnak a nei.

May be an image of 2 people and people standing

Myanmar buainak dem deuh le luat thei dingin a zuam thu a tarlang. USA acozah siseh, ramdang acozah le bawmtu tha si dingah a phunphun in cakuat in siseh, tikcu caan pek ih a zuam thu Siangbawi Hre Kio cun a cakuat ah a tar fawn.

A netabik thucah ahcun, “fa le nau pawl beidong lotein hmailam feh dingah kan tang sinsin cio pei. Pakhat le pakhat thla kan camsakaw cio pei. Natnak lakah ralrin thiam kan zuam cio pei. Ralhrang lakah ruahsannak tumpi thawn nun kan tum sinsin pei.

A netnak ih thuneitu cu milai an si lo. Bawipa kan Pathian a si, ti kha hngilh hlah uhsi. ‘Leilung tlun hmuahhmuah ih thuthentu cun dingthluk lairelnak thawn thu a then lo ding mawsi? Amai’ tikcu caan ah kan thlacamnak a kimter leh ko ding. A kim tikah cun kanmah duh caan ah kim sehla kan timi hnakin a famkim deuh ding.

Kan Pathian in amah ram kautertu ding le amai’ hmin thantertu dingih in hrilmi Laimi pawl ih kan tuarmi le kan tontehmi hi alak cu a si hrimhrim lo ding, tiin zumnak thawn ka cakuat ka netter,” tiah Falam Bible lettu Siangbawi Rev. Dr. S. Hre Kio cun Chinmi hrangah cakuat ropi a ngan.

May be an image of text

 

May be an image of text

Be the first to comment

Leave a Reply

Your email address will not be published.


*