Bawhlungsit hminthang Gerard Pique cun caan reipi duhdawt zetih a kopmi a thainu Shakira a rinum losan, tiah Social Media ah a lar zet.
Gerard Pique ih nunau dang a kopmi hi Barcelona FC ih suakthuan lekthiam Pablo Gavi hringnu nu a si, tiah rinhlelh a si.
Troll Twitter Account pakhat cun Pique thawn nupa sualnak tuahtu (uire) hi Barcelona FC ih arsi thar kum 17 mi Pablo Gavi ih nu a si, tiah an tarlang.
Daily Star thuthang cun Social Media ih an tarlangmi le an rinhlelhmi hi Pablo Gavi ih nu a si lo, tiah a ngan.
Daily Star cun Barcelona FC ih dungkham legend pakhat le nunau pakhat cu ihkhun ah an sual lai Shakira in a hmu ih an karlak boruak a se zet ti lawngin a ngan thung.
Thuthang puarpawleng tam zet suak lakah thuthang sirhsantlak bik ih ruahmi Spain EL Periodico cun hi thuthang pawl hi thudik lo hlir an si, tiah a el ve.
EL Periodico cun bawhlungsit thiam Pique thawn nupa sualnak tuahtu hi nunau kum 20 kiangkap, sam sui rong neitu a si ih Gavi ih nu a si lo, tiah a nemhngetsak.
Pique ih a thupten a kopmi hi tleirawl a si ih sui sam rong neitu si in Barcelona ih puai tuah tawlreltu (event hostess) le Barcelona ih tlawngta a si, tiah an sim.
Spain thuthang ih thuhla zingzoitu mi pahnih cun Gerard Pique le hi tleirawl nute hi cop le cop ah an tongaw theu, tiah an tarlang hleiah a nupi Sharkira khalin a pasal le tleirawl nute ih tonawk theu cu a theih thu an tarlang ve.
Tu fangah hin bawhlungsit thiam Gerard Pique le a nupi zaithiam Shakira tei’ nupa nun cu a derthawng zet. Shakira thawn buaibainak belhsah lo dingin le Shakira ih tuarnak pawl dem deuh dingin Gerard Pique cu zarh ziangmawzat inn dangah a rol lawk, tiah Spain Media lam cun an sim.
Barcelona FC ih dungkham Gerard Pique le a nupi hi nupa thenaw ciah si loin hmun dangdangih an umsanawknak hin thenawk lantanak ngaingai a suah an phansak zet thu thuthang tampi ah an ngan cio.
Gerard Pique le Colombian zaithiam Shakira te hi an neihawknak kum 10 a kim thlang ih fanau rilrah pahnih hmel hmu zo an si. Mi ih ngainat hlawh zet nupa khal an si.
Leave a Reply