SAC ralhrang in Matupi ah zan biakkhawm an khap

Chin ramkulh, Matupi khawpi ah SAC ralhhrang in khirhkhan zetin ral an ven ruangah Khristian biakinn pawl zan ah biakkhawmnak nei lo dingin an khap, tiah theih a si.

SAC ralhrang hin Myanmar rampi thuneihnak a lak hnu, Matupi khawsung ahhin zan ah lengsuak lo dingin thu an suah, biakinn ihsin khawm ttiak pawl kut an thlak ih pastor pawl hnenah biakkhawmnak nei lo dingin an hringhro.

Zan ah ralhrang tam zet cu inn tinah lutsuak in mikhual cazin an lak theu ruangah zalen zetih biakkhawm a ngah nawn lo, tiah tualsungmi pawl hnen ihsin theih a si.

“SAC ralhrang in Myanmar rampi thuneihnak a lak hnu Matupi ah zan ah leng suak lo dingin thla tam nawn thu an suah. Cumi cu thaten kan thlunsak ko. An thusuah a cem hnuah zan biakkhawmnak kan thoksal.

Asinan ralhrang in biakinn ihsin tlung pawl an kai ih an vua an vel. Cumi hnuah security phuahlam in kawhhran upa le pastor an hringhro ih zan ah khawm lo dingin an sim.

Atu ahcun Khristian in zan ih Pathian biakkhawmnak kan sungral a si hi,” tiah Matupi khawmi pakhat in Irrawady Times hnenah a sim.

Matupi khawpi sung lawng si loin khawpi naihniam khua pawl khal zan ah biakkhawmnak an nei ngam nawn lo, tiah theih a si.

Cuvekin khawhar inn khalah Lai nunphung vekin a bur ih lenkhawm, tohpiawk khal an nei ngam lo. CDF-Matupi ih luah ram khaw malte lawngah zan biakkhawmnak an nei thei fang, tiah Matupi peng, khaw thenkhat hnen ihsin theih a si.

Cu hleiah SAC ralhrang in Matupi peng ih khawte 7 cu hmun ttihnung tiin Red Mark a pe, tiah theih a si fawn.

Rong sen ih a hminsinmi khua pawl cu luhsuak khap a si ih Matupi khawpi ihsin feh duh a si khal le Matupi khawpi uktu in ca a ken duh lonak zarh hnih lenglo a si zo.

Cun, hi khua 7 mi pawl khal Matupi khawpi ah duhduh ih tlawnlut khap a si ih a tlawngtu cu kaih an si ding, tiah SAC ralhrang in thu an suah, tiah Matupi khawmi hnen ihsin theih a si.

SAC ralhrang in Red Mark a pekmi khaw 7 pawl cu မားဒူ၊ အမ်ဆွေး၊ ဝလံပီ၊ ဝလံတဲ၊ လာလွီး၊ လွီဗန်း le ရဲန်ရောင်း an si.

Hi khaw 7 cu SAC ralhrang in a duh tiktik ah a siim thei, vanzam in a do thei ruangah rak tuangtim cio dingin Matupi khawmi pakhat cun duhsak zetin a cah hai.