SAC ralhrang in kum 203 thawngtla dingin daantat.

ဗိဿနိုး PDF sungtel pakhat kum 203 thawngtla dingin daantat.

Magway ramthen sungih SAC ralhrang dothlengnak pawlkom pakhat a simi ဗိဿနိုး PDF ih sungtel Ko Aung Khant Oo timi cu SAC ralhrang thuthennak zung pahnih kom in kum 203 thawngtla dingin daan an tat, tiah theih a si.

Anih hi 2022, January 31 ih kaihmi a si ih November 15 ah တောင်တွင်းကြီး thuthen zung in Section 505 le puaktheithil thubuai 3 thawn kum 10 thawngtla dingin daan an tat.

Cumi hnuah Magway thuthennak zungin Section 50 (a), 51 ( c), 52 (a) le 54 tiin kum 193 daan an tat ih a zaten kum 203 a si.

Ko Aung Khant Oo hi Magway khawpi, ဒေါင်းနေ thawnginn ah khum a si ih an kaih laiah an hrem natsat tuk ruangah a thinlung a kim nawn lo, tiah theih a si.

A innsang lam cun ralhrang in thinlung molhmelhnak sivai an dawt, tiah an sim thung. Anih hi ralhrang in an kaih thei lohli lo ruangah a nu le pa, a farnu 2 an kai ih cumi hnuah amah an kai thei fang.

Atu ahcun a innsang pawl cu suah an si zo, tiah theih a si.

Ko Aung Khant Oo hi SAC ralhrang in ဗိဿနိုး PDF ih thuphuangtu ဗိုလ်ထန်ထွဋ် ah neih in an kaihmi a si.

Asinan, Ko Aung Khant Oo thawnginn ih a luh hnu khalah ဗိုလ်ထန်ထွဋ် cu lenglamah Dalan thianfai le bomb puahnak ah a hmin a lang rero lai, tiah an sim.