SAC ralhrang in CNA Camp tlunvan ihsin do dingah ral an relmi zuk thangsuak

Chin National Front/Chin National Army (CNF/CNA) ih Headquarters Camp Victoria umnak cu SAC ralhrang in tlunvan lam ihsin do an tum ih a thuptei’ ral an relnak le an hmuitinmi cazin zuk pawl cu social media ah a thangsuak tiah The Mindat Post thuthang cun a tarlang.

Cui’ zuk pawl cu Chin Human Right Organization (CHRO) in an Twitter cahmai ah an tarlangmi a si. Cui zuk pawl ahcun Google map, ralkap hmanmi map, hliakhlaitu vanzam ihsin zukmi Camp Victoria umnak hmunram number thawn langternak zuk pawl a tel.

Cuvek thotho in tlunvan lamih an do tikah thupi deuh ah ret ih a sangsangten an kah dingmi English cafang thawn khihhmuhnak tuahmi zuk pawl khal a tel tiah hmuh a si.

Mani November 7 ah SAC ralhrang cun Hakha le Thantlang ritawknak Timit ram cu tlunvan lam ihsin donak an nei zo.

A liam ciami November 1 le 2 ni khalah SAC vanzam pawl cu Thantlang peng le Chin National Army headquarters Camp Victoria kiangkapah an zam rero tiah theih a si.