July 8 ah Thailand ram ih rittheih sivai laltu (drug gang leader) Saranya Faknuam le a tlangvalpa an kai, tiah Bangkok Post in a tarlang.
SN77 tiih theih lar zetmi rittheih sivai lalnu Saranya Faknuam kum 35 cu Nonthaburi ih a inn ah an kai ih Thai Baht 100 million lenglo man thilri khal an laksak.
Thai rittheih sivai dotu ramkulh palik le thlingthlatu (Narcotics Suppression Bureau, Provincial Police Region 1 le a military intelligence unit) pawl cun July 8 ah Bangkok ih hmun 3, Nonthaburi ih hmun 5 le Saraburi ih hmun 2 ah an luhhnawh.
Thilri an laksakmi lakah mankhung zetzet motor 5 le nazi 2 a tel. A motor pawl hi Thai Baht 30 million man Porsche GT2 RS, Thai Baht ting 30 man Lamborghini, Bath million 7 man Nissan Skyline R 32, Baht million 3 man Toyota Alphard, Baht million 2 man Mazda RX7 URUS le Baht 300000 man Honda Jazz pawl an si.
Nazi pahnih an laksakmi cu Thai Baht 20 million man Richard Mille le Baht 4.5 million man Patek Philppe an si.
A inn ahhin pistol 9mm pakhat le cerek bawm 3 khal hmuh a si.
SN77 rittheih sivai lalnu hi 2017 December 13 ah methamphetamine sivai tablet million 5 le methamphetamine khal (ice) Kg. 120 khal an kaihsak zo ruangah rinhmai a si lanta.
An zingzoi vivonak ah Saranya Faknuam hi rittheih sivai tolluttu SN77 ih lalnu a si, tiah an hmusuak vivo.
Curuangah amah kaih theinak warrant an suah, tiah palik bawi Sarayut Sa-nguanpokthai cun a sim.
July 8 ah SN77 rittheih sivai lalnu Saranya Faknuam le a tlangval kum 35 mi Chokphiphat Chanwichian cu Bangkok ramsung Taling Chan District Boromratchonnaree lamzinpi ah an kai.
Anih hin ramsung sivai tuahtu pawl thawn hnatuantlang in hmuntin ah agent nei in a kuat theu thu a sim.
Leave a Reply