RC Father ih thucah ropi: ‘Tuiṭum hi Pathian le Satan doawknak a si’

Karenni raltlan pawl bawmtu Roman Catholic Father Dominic Win Kyaw Htwe cun SAC ralhrang a hmuh dan hitin a rel.

“Kei cun an hmin hi ralkap ti khalin ka ko duh lo, khawsia/ramhuai tiin ka ko. Annih hi milai an si lo. Milai si hai sehla hitluk lawmmam in tawrh an mawh lo ding.

Biaknak lamin ka sim asile annih hi Satan an si. Curuangah atu dothlengnak hi milai le milai doawknak si loin Pathian le Satan doawknak a si, tiah ka hmu.

Curuangah diknak le sualnak, thutak le thuphan karlak doawknak a si. Ralhrang khawsia pawl ih sualralzia phosuahnak tongfang khal a um thei lo, ti ding tlukin an tawrhmawh.

Karenni lawng a si lo. Hmun tinkim Sagaing, Chin, Kachin, Karen tivek pawl ah ralhrang khawsia pawl ih mangmittokza ih an cangvaihnak kan hmu thei. Hihi ka mawhsiat lawlaw. Hi hnakih do vivo tlak khal an si.

An thiltuahmi pawl zoh vivo tikah raltlan mipi harsatnak an pe sin. PDF si lo mipi menmen khal tihphannak an pe.

Leitlunmi pawl ih an rel uar zetmi Human Rights buar, Genocide, miphun cimihternak a zaten an tuah theh. Sualmawhnak hmuahhmuah an tuah lomi a um lo.

Asinan hitlukih misual rori hi ziangah UN in hmu keukeu cingin mipi in ra bawm duh lo si pei!

A tirah cun R2P kan ti ih ruahsannak sang zet kan nei. Tuni ahcun cui’ kan ruahsannak pawl cu mero sem kan tum vek fang a si.

Ziang a si khal le hi dothlengnak hi neh ding tengteng ih kan do dingmi a si.

Biaknak lam hruaitu ka si vekin raltlan pawl bombawi hi ka hna tum bik a si. Raltlan pawl hnenah feh in record ka tuah. Ka lamzin a oltlawng lo zet,” tiah a sim.

Dominic Win Kyaw Htwe hi Shan ramkulh, Keng Tung khuami a si ih SAC ralhrang in Myanmar rampi thuneihnak an lak tikah nasaten lamzawh duhphorhnak in siseh, online ihsin siseh rak dokalh zettu a si.

SAC ralhrang in kai dingin hrinhronak an pek tam tuk ruangah sahimnak hawl in Thailand ram ah a tlan.

Asinan, Thailand ram ah um huahhi men loin raltlan pawl bom thei dan ding dap in a cangvai ih Myanmar ramsung ah a lutsal.

Cutin Karenni ramkulh, Karen ramkulh ih raltlan harsa pawl bomnak a pe. (Hi thu hi Khit Thit Media in interview an tuahmi sung ihsin a remcannak zawn kan lakmi a si).