Ramleng Mindat pawlkom in raltlan bomnak sumpai an kuatmi bum an tong

Ramleng thleng Mindat pawlkom pawl hnen ihsin Mindat peng raltlan pawl bomnak sumpai an kuatmi India tangka ting 96 (Rs. 9600000) Myanmar tangka in ting 2000 lenglo cu hlepsak (bum) an tong, tiah theih a si.

SAC ralhrang ih siimnak ruangah mai’ khuaram suahsantu Chin ramkulh, Mindat peng ih raltlan pawl, in le ei, sivai leinak hrang ramleng thleng Mindat pawlkom pawl ih an thawhkhawmmi tangka India (Rs. 9600000) bum an ton, tiah Mizoram ih um Mindat peng pawlkom hnen ihsin theih a si.

Hi sumpai pawl cu India, Mizoram ih raltlan ve NLD hluttaw hlun pakhat ih theihpinak vekin Myanmar ih suak, Aizawl ih khawsa mi pakhatih Bank Account ah an kuatmi a si. Bank acc neitu hi Myanmar mi, Aizawl khawpi ih khawsa Mangliana @ Emma tiah theihmi a si.

Mangliana cun a bank acc ih lut sumpai India ting 96 cu a suah ih a relhhlo, tiah theih a si.

Ramleng thleng Mindat pawlkom pawl ih kuatmi sumpai cu bank acc 3 ah 2021, September ah an kuat. Mangliana ih umnak hi Aizawl khawpi, Zarkawt veng A 31 ah a um.

Mangliana ih pa cu Thantlang peng, Dawn khua, Pu Roland a si ih a nu hi Falam peng suak a si zum a si ih an zingzoi rero lai.

Sumpai tlanpi cu Mangliana @Emma cu suahpi unau 9 lakah upa bik a si ih a nupi hmin hi Lalinmawii a si ih fanu kum 3 te an nei. A hlanah cun India-Myanmar ramri ah kuhva rah in tol in sum an tuah theu, tiah theih a si.

Hi sumpai thubuai thawn pehparaw in ramleng thleng Mindat K’Cho Organization (IMCO) ih tuanvoneitu pakhat cun, “Leipar ih harsatnak tuar rero, raltlan pawl hrang sivai le in-ei man hrangih kan bomnak a si vekin bum kan ton tikah kum upa le nauhak pawl buaipisirh in an buai,” tiah a sim.

Cuvekin sumpai bum ih tlanpitu cu “IMCO cun amah Emma lole a sungkhat pawl parah Chin Nunphung daan hmang in ngahsal thei dingah kan zuam ding,” tiah IMCO tuanvoneitu cun a sim fawn.