Ram (3)nk Thleng Generation Z Au-aw: Pu Van Tuah Piang

Tukum a vei 75 nak Chin National Day hrangah, ka umnak khua Indianapolis (Chindianapolis), USA ih tuah dingmi hrangah cangan zuam awknak (Essay Competition) ah judge pathum lakah ṭuanvo in pek ve. Kan dung kum khalah ka rak ṭuan zo.

Tukum ih cangan zuamawknak ih telmi 12 lakah mi 10 in Mirang in an nganih, pahnih in Halkha in an ngan. Kei hi Mirang, Falam, Mizo, Halkha le Kawl ca cu a mawi tawk ka check sak thei.

Himi cangan tu pawl hi mino hlir an si. A tlangpi in High School kai lai tete le USA ih nauhak ten rak thleng lole USA ih suakmi an si.

An cangan mi pawl grade pek dan cu academic writing system ih an hman mi Rubric system hman a si.

An cangan mi thulu cu Chin ṭong in “Kan ṭong thupitnak” ti a si. An zaten deuh thaw in, mah le suahpi ṭong an thupit tir zia le thiam ding tengteng a si zia an nganmi ka hmu tikah ka lungzur zik lamlam. A tawi zawngin an ngan tlangpi mi cu……

1. USA thlengmi Chin mino tampi Chin ṭong kan thiamlonak cu Chin ṭong phun tam tuk kan nei ruangah mah le pianpi ṭong thiam khal le Chin mi zaten kan biak aw thei cuanglo.

2. Nu le pa hrakkhat in fale Mirang ṭong an thiam kha uar awknak le Mirang zirnak ah an hmang riangri.

3. Inn ah tampi in hman a ṭul.

4. Chin ṭong (ziangvek khalin) youtube, social media ah nauhak le mino zoh tlak kan neih ṭul.

5. Community le Church cio in mah le ṭong ciar in Sunday School lawngah siloin ṭhal tlawngpit tivekah Chin ca zirnak nei sinsin ding.

6. Kan Chin thuanthu tampi in cabu in siar ding tuah ding.

7. Chin National Day le Chin New Year le Biaknak lam puai tuah tinten Chin ṭong hmang uar ding.

8. Chin mi tampi umnak tlawng tivek ah Chin ṭong zir thei dingin tuah ding.

Hi pawl hi a tlangpi in an nganmi pawl a siih, kan fale generation Z pawl hi mah le ṭong cio kilkhawi an duh zia le an saduhthah hmuh tikah lung a awi ih, lung a zur thei rori.

Leitlun ah ṭong ci 7106 tluk a umih, ni 14 tinten ṭong phunkhat a hloral ringring ti a si. Ziangah tile a nei tu in an hmang nawnlo ruangah ti a si.

Mah pianpi ṭong cio uar in hman zuam sinsin uh si. Cuticun ni 14 tinte ih a hloralmi ṭong ah kan tel ve lo dingih hnamhlo kan si lo ding!

(Hi thu hi Pu Van Tuah Piang nganmi a si).