Sagaing ramthen, Shwebo pengpi, Khin Oo peng ah raldo dingih timlam rerotu PDF ralkap 4 cu SAC ralhrang in Pyusawhtee helhlong pawl in an kulh-tar ih an that, tiah tualsung thuthang cun a sim.
October 29, simlam nazi 4 hrawngah SAC ralhrang hnenih mi zuarthlai theutu ralhrang bang pakhat cu Khin Oo khawpi suahnak ah PDF pawl in kai dingin an zuam.
Asinan hi ralhrang bang pa hin meithal a neih ve ruangah a rak do ve ih kai ngah loin an um. Ralhrang bang pa cu hriamhmapi thawn Khin Oo khawpi sungah a tlanlut, tiah Khin Oo PDF thuphuangtu cun a sim.
A hriamhma a roh nawn ih Shwebo le Mandalay lamah tuamhlawm dingin motor ih an fehpi laiah Khin Oo PDF in lamzin ah rak bawh ih bomb rak puah an tum.
Asinan PDF pawl ih cangvaih tum dan cu SAC ralhrang le Pyusawhtee helhlong pawl in an thei ih an va kulh hai.
“Khin Oo khawpi sungih Pyusawhtee pawl cu mipi motor laksak in an feh. PDF pawl thawn an tongaw ih hmun le hmun ah an kapaw si ko. PDF 2 cu a hmunah an kap that. PDF ralkap 2 lawngte nunglai in an kai ih leikuang sungah an soisa.
Nam in an taksa thi ko, an at ih meithal in an kah that,” tiah Khin Oo PDF thuphuangtu cun a sim.
SAC ralhrang le Pyusawhtee helhlong pawl in an thahmi PDF ralkap 4 lakah kum 19 mi pakhat a telih midang cu kum 30 tlunlam an si, tiah an sim.
“Annih 4 hi an lungrual thei zet ih thiltuah ding tinten an thlunaw hai ringring. Kut ser meithalte thawn ral an do. Ka sim duhmi cu ralthuam kan tlasam tuk. Ralthuam nei tha nungla raldo thiam zet an si ih an neh tengteng ding.
Meithal an neih that lo ruangah dung an sip ih cumi zawngah an kulh ngah a si,” tiah Khin Oo hrambun PDF pakhatin a sim.
Leave a Reply