Ralhrang tlansuak mi 2, PDF in an kai

Tatma (88) kuttang ih Kah Lah Yah (83) ihsin tlansuaktu ralhrang pahnih cu an nunglai in an kai, tiah theih a si.

SAC ralhrang ih Tatma (88) kuttang Kah Lah Yah (83) ihsin tlansuaktu ralhrang pahnih cu an nunglai in an kaih thu Eagles Army-HPDF in tuni June 12 ah thu an suah.

An kaihmi ralhrang pahnih cu Thet Ko Ko Htwe (ကိုယ်ပိုင်နံပါတ် တ-၅၇၀၅၇၃ ) le Shine Wunna Aung (ကိုယ်ပိုင်နံပါတ် တ-၅၇၀၅၇၂) an si ih annih pahnih hi June 11 ah Madalay-Bhamaw lamzin ah an kaihmi a si.

Kah Lah Yah (83) hi Bhamaw ih ralhrang sakhan a si. An sakhan ah sumpai lam harsatnak le buainak an neih ruangih tlansuak in an relawk thu Eagles Army-HPDF cun an sim.

Eagles Army-HPDF pawl cu Madala-Bhamaw lamzinpi ah hmunram thianfainak an neih laiah tuvekin ralhrang tlansuak pahnih an kaih theinak a si.

An kaihmi ralhrang pahnih cu mipi tanghlum ah beu thei dingin tlunlam upa pawl hnenah an simsak rero lai, tiah an sim.