Ralhrang ti luh longpi (Submarine) ihsin ti ralkap 7 an tlansuak ih an thlahlawh pawl an captain in a pumpilhsak

Myanmar SAC ralhrang ih ti luh longpi (Submarine) Min Ye Thein Tha Thu ih ti ralkap 7 cu an tlansuak ih ti ralbawi Captain Thet Naung cun a tlansuaktu pawl ih thla hlawh a suahsak rero lai, tiah theih a si.

Min Ye Thein Tha Thu Submarine longpi ih hnatuan ti ralkap a simi Deputy Officer Aung Ko Myo, Sergeant Yan Nyein Khan, Sergeant Aung Kyaw Kyaw, Sergeant Wai Yan Lin, Sergeant Win Htike Aung, Sergeant Min Maung Maung le Deputy Superintendent Wunna Kyaw te pawl cu 2021, SAC ralhrang in rampi thuneihnak an lak ihsin an hna an pehzom nawn lo ih ruangah ralkap tlan cazin ah ret an si ih an hawl rero.

Asinan, an hnatuan lo sung le tuni tiang an thla hlawh hmuahhmuah cu Ti ralkap (Navy) ralbawi Captain Thet Naung in a rak suahsak ih a eithup rero men, tiah theih a si.

“Ti luh long (Submarine) Min Ye Thein Tha Thu ih ralkap tlansuaktu pawl ih thla hlawh cu Captain Thet Naung in zu le sa cennak ah a hmansak rero. Amah thawn nuamtawltu pawl khal longpi ih hna ra tuan tul nawn lo tiin zalen zetin caan a pek men. A tangsun pawl cu hna khunghar a tuanter fawn. Anih hi DSA ralkap tlawng zirnak 44 ih tlawng theh a si. A nomtawlpi pawl cu ziang hna khal an tuan lo. Long thuhla khal an thei lo,” tiah ralhrang lak ihsin thu a putsuak.