Karen ramkulh, Myawaddy peng, Ukritha ralhrang sakhan KNLA, KNDO le PDF tangrual ih siimnak ah ralhrang lam bawm dingih feh pawl cu June 30 ah tangrual lam in an rak kap ih lamzin ah an thi phengpheng, tiah theih a si.
“Lamzin tluanah an ril phengpheng a si ko. Ralhrang lam cun thi le hlo um lo le nehtu vekin thu an than. Kanmah tangrual pawl sung cuahco vekin an rel. Asinan zuk zoh uhla nan thei mai ding,” tiah PDF ih Southern Regional Military Headquarters lamin an sim.
Tufangah hin SAC ralhrang lam cun thi le hlo an tam ruangah Ukritha sakhan siimtu pawl cu vanzam in bomb a thlak rero.
Bomb thenkhat cu Thailand ram lamah a tla ih a puak. Curuangah Thailand ramri kil ralkap pawl ralrinnak an peaw rero, tiah theih a si.
Myanmar ramsung buai ruangah Thailand ramri kiltu pawl cu Tak province, Photphala Township ih Hwe Mai khua ah ralkap security fek zetin an retaw.
Myanmar lam hriamhma ngah ih tlanluttu pawl cu Thailand lamin milai zawnruahnak in sivai an rak tuamhlawm ih tu dinhmun ah raltlan 307 an thleng zo, tiah Thai thuneitu pawl in an sim.
Leave a Reply