Ralhrang ih phone thlaumi an sar, mipi an hrem that lai video le zuk hmusuak

Sagaing ramthen sungah SAC ralhrang in ral siim hna an thawh sungih mangmittokza ih an cangvaihnak video le zuk pawl RFA cun a phosuak.

No description available.

Thlazuk 144 an ngahmi lakah khuami 30 kut dunglet ṭawn ih an kaihkhawm lai, phungki tlawnginn hnuaiah an tokhawmter lai pawl a tel. Cu hleiah an mit pawl puansia ih an tuam lai, kut dunglet an ṭawn lai, an tukkhum lamin an kah that ih thisen li liangliang ih khuami 5 an tluknak le miruak kiangah ralhrang 2 an din lai zuk pawl a tel.

Video ahcun ralhrang 3 an to ih an mi thah zat uangaw zetih an simawk lai a um ih himi video ih anmah ralhrang rori in Selfie ih an zukawknak phone an thlau sual ih khuami pakhatin a sar hnuah RFA a pekmi a si.

No description available.

Ralhrang 3 ih selfie awknak ahcun ralhrang pakhat cun milai 26 rapthlak zetih a thah thu le an hngawng a raisak thu pawl a rel. Ralhrang pakhat cun milai 5 a thah thu a rel ve. An thahmi lakah nunau a tel ih, ‘ka ṭih tuk, ka ṭih tuk,’ tiah a au thu a rel. Ralhrang pakhat cun milai 8 a thah zo thu a rel ve.

Ralhrang hnipuan an zingzoi vivonak ah Kawl ralhrang seal a si ih an ban ih seal a lang dan ah Sagaing ramthen ih hmunkhuar Northwestern Regional Command (NMSP) seal a si. Cuhleiah an kenmi ralthuam, kiangthawng le bawmrang pawl ihsin Kawl ralhrang rori an si, tiah nemhnget a theih.

An meithal tawkawng ih ‘708, 4/3 timi cu  Yangon hrambun No. (4) Operations Command Headquarters kuttang Kah Mah Yah (708) an si, tiah theih a si ih annih hi Sagaing le Magway hrawngih cangvaitu bik an si.

Hi ralhrang video le zuk putsuakmi thu ah SAC ralhrang thuphuangtu Zaw Min Tun cu RFA in thusuhnak an nei ih anih cun leipar thuhla suhfiang hnuah simthannak a neihsal ding thu in a sim.

No description available.

Ralhrang pawl ih phone thlaumi hi China OPPO a si ih khuami pawl an tawnhremnak zuk cu May 10 ni ih ta a si ih khuami 5 an thahnak zuk cu May 11 ta a si. An kaih ni le an thahmi pawl an zingzoi tikah hmun khatih thilthleng a si, tiah theih a si vivo.

Zuk 144 hi April 13 ihsin June 3 karlak ta hlir a si. Mino pakhat cu a awm ah nam an dawt ih thu an suh rero lai zuk April 28 ta ti a lang thei.

Thilthlennak hmun hi Ayartaw peng ah May 7 ahkhan ralhrang pawl an lut ih minung 30 an kai. Mi 6 an that timi sirhsan in theihsuak a si vivo.

An thahmi mi 5 pawl hi RFA in a zingzoi tikah pakhat cu Ye Oo khawpi ih electric thilri zuarnak dawr tacik angki a hruh ruangah Ye Oo khuami a si, ti an hmu.

No description available.

Cun, khuami pawl an kaihkhawmnak hmun hi Mongdaing Pyin khua ih phungki tlawnginn a si, tiah an sim. Himi laiah Internet line a siat tuk ruangah khuami pawl cun thuthang an thlah thei lo ruangah an khuami thih le hloh thu zo hnen hmanah an simthan lo tiah an sim hrih.

Ralhrang pathum selfie aw pawl cun milai thah hi an rawl ei kaa thawtnak tluk fangin an rel.

“Nang teh ziangzat na that zo? Kei cu 26 ka that… kei cu 5 ka that… kei cu thisen hi ka fih tuk…” tivekin hnihsuahsainak ah an hmang.

“An hngawng ka tan ih vei li nga hrawng ka sah hnuah ka phum men,”

“An thluak a pawt. An hnipuan le an taksa erhaw pawl kan hok ih meisa in kan urkang,” tiah an mi thahmi pawl uangaw zetin an rel.

Cumi hnuah inn tinah lutsuak in an ar, an vok pawl an thahsak ih an ei pawl tiangin an rel vivo.

No description available.

Phone kaitu bik cun, “Kei hi mi thah lamah ka expert tuk zo. Ka nauhak lai ihsin mi thah ka paih hrimhrim. Asinan keimah taksa nat ding cu ka tih,” tiah a rel.

 

Be the first to comment

Leave a Reply

Your email address will not be published.


*