Ralhrang Jet Fighter 2 in AA sakhan bomb thlak, thi le hriamtuar tam

Thailand-Myanmar ramri ih AA sakhan cu SAC ralhrang in vanzam in bomb a thlak ruangah AA ralkap thenkhat an thi.

Myanmar-Thai ramri, Karen ramkulh, KNLA Bridage 5 luah ram sungih Arakan Army (ULA/AA) sakhan pakhat cu tuni July 4 ah SAC ralhrang in vanzam in bomb in thlak, tiah AA thuthang cun a phuang.

SAC ralhrang vanzam pahnih in bomb an thlak ih sakhan kiangkapih AA ralkap thenkhat an thi, hriamhma tuar khal an um, tiah thuthang ahcun an ngan.

Cu hleiah sakhan sungih sizung, sikhan le thil thitnak cet telin innpi an sakmi tiangin a siat.

SAC ralhrang Jet Fighter pahnih cun ramri ih AA sakhan bomb an thlak ngah veten, Thailand luahram tlunvan tlolak ah a zam phei tiah theih a si.