Ralhrang in tikhur ah ziandawng an thlak ruangah khuami pawl pumna le sungdok in an um

SAC ralhrang cun khuami pawl ih hmanmi tikhur sungah ralthuam tum cerek le zian pawl an thlak ruangah Saw khuami pawl in harsatnak an ton thu an rel.

Saw peng, Akyi khua ah khuami pawl cun an khaw tikhur ih tidai an in tikah pum na, sungdok, kawtha lo in an um ciamco. An tidai inmi a thianghlim lo a si ding, tiin June 21 ah tikhur thianfainak an nei.

Tikhur cu cet in an zukkang ih a sungah tum in cenbek pawl thianfainak an neih tikah ziandawng tam zet an hmu. Hi ziandawng pawl hi ralhrang ih thlakmi a si, tiah an sim.

“Hihi ralhrang in mipi pawl harsatnak an thlentermi ralrel dan phun khat a si. Curuangah tualsung hriamhrei kai pawl thawn khua le ram thianfai hna kan tuankhawm a tul,” tiah Saw peng zohkhentu pawlkom in an sim.

Khawsung tikhur ah ralthuam tum, ziandawng pawl a thlatu SAC ralhrang hi May 22 ihsin thok in Kyaukto-Pakkoku ih lamzin ih ra motor runrual pawl an si, tiah theih a si.

May thla ne ihsin thok in Magway ramthen, Yaw ram (Gangaw, Kyaw, Htelin, Saw le Kyaukto) peng pawl ah SAC ralhrang pawl a runrun in ram an nor rero.

Atufang ahhin Gangaw, Htelin peng ah SAC ralhrang cu lamzin 3 in ral an tho, tiah tualsungmi pawl in an rel.