Sagaing ramthen, Indaw khawpi ah February 1 ahkhan ‘Silent Strike’ thla an zuk tiin mipa pakhat le nunau pakhat cu SAC ralhrang in an kai.
Indaw khawpi, Aung Chan Thar veng ah February 1, zinglam nazi 9 hrawngah ‘Silent Strike’ thlazuktu mipa pakhat cu SAC ralhrang kuttang palik in an kai, tiah The 74 Media in a tarlang.
“Anih hi khawpi sung tthing riahriah lai thla a zuk ih palik duty pawl in an kai. An kaihmi hi kum 40 hrawng ih upa U Hla Aung a si ih Indaw palik sakhan ah an hreng,” tiah tualsungmi pakhat in a sim.
January 29 khalah PDF training a kai, tiin nunau pakhat, Indaw tiva kiangah SAC ralhrang in an kai, tiah Indaw PDF tuanvoneitu in a sim.
An kaihmi nute hi kum 25 mi Ma Nwe Nwe a si ih anih hi Beauty Parlour dawr ong a si. A dawr thilri a lei rero laiah an kai, tiah Indaw Revolution IR ih tuanvoneitu in a sim.
“Tu tiang a nu le pa thawn an pehtlaihaw thei hrih lo. Ma Nwe Nwe hi ceiawknak dawr ong men a si ih PDF thawn pehparawknak an nei lo. Asinan PDF training a kai dah, tiin le PDF pawl a bawm, tiin an kaihmi a si,” tiah Indaw Revolution IR ih tuanvoneitu cun a sim.
Leave a Reply