SAC ralhrang mangpa Min Aung Hlaing ih kaihhruai ralhrang pawl hin ramsung hmun tintian ah rapthlak zetih tualsungmi an hrem lai, an thah lai pawl, thuthang, thlazuk le videio a suak theu.
Atu khalah Karenni miphun an hrem lai, video pakhat cu KNDF hnen ihsin RFA in an don thu an tarlang. Hi video hi November 6 ah ralhrang pakhat ih phone thlaumi an sar ihsin a hmuhmi a si, tiah KNDF cun an sim.
Video ahcun mipa pakhat puansia in a mit tuamsak a si ih a hngawng le a kut khal hridai in dunglet ih ttawn a si. Room pakhatah ralhrang in a taksa hmunkip ah fung in a thawi ih PDF pawl ih thuhla a sut.
Kaih tuar pa cu a nunnak laksak ding vekin ralhrang in phungki sermon mi a ngaiter. Hi thilthlan caan hi September 27 ah a si, tiah Phone record ni ihsin an sim thei.
RFA cun ralhrang in tualsungmi an soisat lai, tuksumza ih mi an thah lai le an thahmi pawl zuknak video sau zet an nei nan, mipi hmuh ah pholang a remcang lo, tiah an sim bet.
RFA in KNDF thu an suhnak ah KNDF cun tuksumza ih mi hremtu hi an uniform langdan ah ralhrang tatma 66 ih ခလရ 1 an si, tiah theih a si.
Shan ramkulh le Karenni ramkulh ritawknak မိုးဗြဲ kiangkap hrawngih ralhrang an si ih an kaihmi pa khal Karenni miphun a si, tiah an thei vivo.
Ralhrang pakhat cun a mi hremmi pai’ hnenah, “Kei hi mi ka hrem hnuah mi ka zangfak theu,” tiah hmuhsuam zetih a tong lai, Video ahcun a lang.
Zoh harsa bikmi video cu ralhrang in funghreu in a hngawng a reek ih a tluk hnuah a bop le luthlung ah a vuak ciamco lai hi a si.
Karenni ramkulh sungah SAC ralhrang tatma 66 hi ramsa nun in an nung ih pengtthuam 6 le 5 ih inn pawl ah an lut. Nunau, mipa thliar loin an kut an ttawn hnuah ban ah an hreng ih an inn cop in an urkang.
Khawsung an luh tikah a tlansuak man lo, khawmi pawl an kai ih thu an sut. An duh vekin an sim thei lo asile an kap that hluahhlo men. Cun, raltlannak hmun ihsin in-ei la dingih khaw tlungtu pawl an rak kai ih milai ralphaw ah an hmang fawn.
Ralhrang cangvaih dan zoh tikah mipi pawl hin dothlengnak thazang pe ngam lo dingin an hringhro tinak a si.
Kan mipi in thahsak, in hremsak nan, kannih cun rinsantlak zetin dothlengnak kan tuah pehzom vivo ding.
Mipi pawl khalin ralhrang an huatnak roh deuhdeuh ih kan dothlengnak thazang a that phah sawn, tiah KNDF ih tuanvoneitu cun RFA hnenah a sim.
Leave a Reply